د احصايیې او معلوماتو مرکزي ادارې مسوولان وايي، دا وخت هېواد کې له غوړو حبوباتو په دودیز ډول غوړي تولیدېږي.
د احصاییې مرکزي ادارې مرستیال حسیبالله موحد سلاموطندار سره خبرو کې وايي، کهچېرې له غوړو دانو نه د غوړیو تولید لهپاره معیاري فابریکې جوړې شي؛ سره له دې چې د غوړیو او نورو هغو څېزونو ـ چې له غوړیو څخه جوړېږي ـ بیه کمېږي بلکې یو شمېر اوزګاره کسانو ته به د کار زمینه هم برابره شي.
د ده په وینا، یوازې د ۱۳۹۷ کال لومړۍ ربعې کې د دې بوټو د تېلو له صادراتو نه ۴.۷ میلیونه ډالر عاید تر لاسه شويدي.
د کرنې، اوبو لګولو او مالدارۍ وزارت مسوولان وايي، تېرو کلونو کې یې له غوړو دانو نه د غوړیو تولید فابریکو جوړولو په برخه کې د کورنیو پروژو، ملي او نړۍوالو بنسټونو له لوري، ځېنې کارونه کړيدي.
د کرنې، اوبو لګولو او مالدارۍ وزارت ویاند اکبر رستمي وايي، د کرنې پرمختګ او د کلیو پراختیا پروګرام یا کارديایف په مالي او فني همکارۍ، هلمند او بلخ ولایتونو کې د سوداګرۍ دوه لویې فابریکې جوړې شوي. د ده په خبره، دغه فابریکې کال کې له مالوچو څخه ۶۴ متریک ټنه غوړي تولیدولی شي.
همداراز، د اسیا پرمختیايي بانک په همکارۍ د نورو پروژو له لارې بلخ او ننګرهار ولایتونو کې هم د سوداګرۍ نورې کارخانې جوړې شوي چې په یوه میاشت ګې له ګیاوو نه ۹۰ مټریک ټنه غوړي تولیدوي.
ښاغلی رستمي وايي، د زیتونو غوړیو تولید برخه کې هم تېر کال د ننګرهار کانال تولیدي فابریکې، د پام وړ د زیتونو غوړي تولید کړيدي.
د کرنې وزارت مسوولان زیاتوي چې په دودیزه بڼه هم د هېواد شمالي برخو او کندهار او هرات ولایتونو کې د حبوباتو غوړیو تولید فابریکې فعاله دي چې د خصوصي برخې له لوري رامنځته شوي او کهچېرې له غوړو دانو نه د غوړیو تولید فابریکو جوړولو په برخه کې لا ډېره پانګونه وشي؛ هېواد به ځانبسیاینې ته نږدې شي.
غوړ نباتات د کروندې له فرعي برخو نه شمېرل کېږي چې د یو هېواد اقتصادي برخه کې بنسټیز رول لوبوي.
مالوچې، کنجد، زغر، سایبین، زمینيبادام او افتابپرست افغانستان کې له غوړو نباباتو ګڼل کېږي.
