په بغلان ولایت کې د لومړي ځل لهپاره د ښځینه لاسي صنایعو پلورنځی او د ښځینهوو لهخوا د خوراکي توکیو د تولید یوه فابریکه جوړهشوې ده.
شاوخوا یوه میاشت کېږي، چې د بغلان په مرکز پلخمري ښار کې د ښځینهوو جامو او لاسي صنایعو درې پلورنځي او د مېرمنو لهپاره د خوراکي توکیو د تولید یوه ځانګړې فابریکه جوړهشوې ده.
د دغو پلورنځیو او خوراکي توکیو د تولید فابریکې جوړول چې خپله ښځینه يي مدیریت کوي؛ د بغلان د مېرمنو د پېر ډېرې ستونزې حل کړې دي.
پلخمري ښار کې د ښځینهوو د ځانګړي خوراکي توکيو د تولید فابریکې مشره وحیده وايي، چې په دغې فابریکې کې ۲۰ تنه بېوزلې او لوستې مېرمنې کار کوي.
د ښځینه لاسي صنایعو د یو پلورنځي مسووله وجیهه سمندري هم وايي، چې د دغو پلورنځیو له جوړېدو سره د بغلان ښځینهوو ته زیاتې اسانتیاوې رامنځته شوې دي.
اغلې سمندري زیاته کړه، که د دوی مالي ملاټر وشي؛ د پلورنځيو شمېر به زیات کړي.
د دې پر وینا، که په بغلان کې مېرمنو ته پلورنځي او دوکانونو جوړ شي؛ هم به مېرمنې په سوداګرۍ کې ښکېلې شي او هم به د کورنو ښځو ته د سودا اخیستلو او بازار ته د تګ بشپړ ارامتیا او د اسانتیا زمینه برابره شي.
په همدې حال کې یو شمېر مېرمنو د لاسي صنایعو اخیستلو پرمهال په پلورنځيو کې سلام وطندار ته وویل، چې په اسانۍ سره له دغو پلورنځیو د خپل اړتیا وړ شیان لاسته راوړي.
دوی له سوداګرو او پانګهوالو غواړي، چې په دې برخه کې پانګهونه وکړي.
د بغلان د ښځو چارو رییسه خدیجه یقین هم په دې ولایت کې د ښځینهوو پلورنځیو او خوراکي توکیو د فابریکې جوړول د ښځو په اقتصادي وده کې اغېزمن ګام بولي او د دغو فعالیتونو د پراختیا په برخه کې د حکومت او نادولتي بنسټونو د ملاټر غوښتونه کوي.
بغلان کې د ښځینهوو لهپاره ځانګړي پلورنځي او د خوراکي توکیو د تولید فابریکه د سویډن، اغا خان بنسټ او د بغلان ښځو چارو ریاست په مالي او تخنیکي مرسته رغېدلي او د کسبګرو مېرمنو په واک کې ورکړل شوي دي.
