راپورونه وايي، چې د پاکستان په مري ښار کې د خبرو اترو له لومړي پړاو وروسته به دويمه غونډه د روان جولای میاشتې په وروستيو کې جوړېږي.
پاکستاني رسنۍ وايي، د سولې دغه خبرې اترې به داځل په چين کې وشي، خو مشخص ځای يې نه دی په ګوته شوی.
د ایکسپرېس ترېبيون ورځپاڼې پر حواله؛ د دغو خبرو اترو مشري به داځل د بهرنيو چارو وزیر صلاح الدين رباني له لوري کېږي.
سلام وطندار ته ځېنو افغاني سرچينو د نوم نه ښودلو په شرط ویلي، چې په دغو خبرو اترو کې به د طالبانو له لوري ملا اختر محمد منصور هم ګډون وکړي.
داسې ويل کېږي، چې ملا اختر محمد منصور د ملا عمر ډېر نژدې کس او مرستیال دی.
اخوا پاکستاني چارواکو ویلي، چې بجینګ او اسلام اباد چمتو دي، چې د افغان دولت او پاکستاني طالبانو د سولې د پروسې تضمين وکړي.
د راپورونو پر بنسټ، دغه دواړه هېوادونه په افغانستان کې د يوې ممکنې او پرمختللې سولې ضمانت ته پوره چمتو والی ښودلی دی.
دغه پاکستاني لوړ پوړي چارواکي اېکسپرېس ترېبیون ورځپاڼې ته ویلي: "موږ په خورا لېوالتيا سره چمتو یو، چې د خپلې وسې هم یو ګام ور اخوا مرسته وکړو، ان اماده یو، چې د سولې په برخه کې د هرې هوکړې تضمين وکړو."
دغه پاکستاني چارواکي د موضوع د حساسیت له امله د خپل نوم له څرګندولو ډډه کړې ده.
د هغه پر وينا، که پاکستان د افغاني مذاکراتو لپاره لاره هواره کړې او ټولې خواوې په دې هوکړه وکړي، چې پاکستان باید له دغې ليکې څخه هم مخکې لاړ شي؛ نو پاکستان د دغو اسانتیاو برابرولو ور هاخوا کار کولو او لارو هوارلو کې به هيڅ ستونزه ونه لري.
د نوي حکومت له جوړېدو څخه شاوخوا ۸ میاشتې وروسته د ولسمشر غني او نورو حکومتي چارواکو د خورا زياتو هڅو په نتیجه کې د لومړي ځل لپاره د کوچني اختر نه څو ورځې وړاندې د اسلام اباد په مري ښار کې له طالبانو سره د خبرو اترو لومړۍ رسمي غونډه وشوه.
کارپوهانو دغه خبرې اترې خورا ګټورې وبللې او په دې سره د سولې راوستلو ته د افغانانو هيلې بيا ژوندۍ شوې.
څو ورځې وړاندې د مشرانو جرګې غړو هم په خپلو عمومي غونډو کې ویلي وو، چې د اختر په شپو او ورځو کې امنيت د اسلام اباد په مري ښار کې د لومړيو خبرو اترو پايله وه.
د سولې په خبرو اترو کې د ننګرهار پخوانی والي او د سولې عالي شورا غړی حاجي دین محمد، د بهرنيو چارو وزارت سياسي مرستيال حکمت خلیل کرزی، د اجرايوي مشر ډاکټر عبدالله عبدالله او د ولسمشر لومړي مرستیال عبدالرشید دوستم استازي او نور ګډون درلود.
له هغه وروسته ملا عمر هم په خپل اختریز پیغام کې د نرمښت تر څنګ د سولې خبرو اترو لپاره شين څراغ ښودلی و.
ملاعمر په خپل پیغام کې ويلي وو، چې له دوښمن سره سوله کول په شریعت کې ممانعت نه لري.
د افغاني طالبانو د دغه مشر له خوا د پیغام له خپرولو وروسته افغان ولسمشر محمد اشرف غني د ملا عمر د پیغام د هرکلي تر څنګ ویلي وو، چې د سولې د خبرو اترو دویم پړاو به ډېر ژر له اختر نه وروسته پیل شي.
د سولې عالي شورا ویاند مولوي شهزاده شاهد سلام وطندار ته وویل، چې داځل به د سولې د پلاوو په ترکیب کې به زياتوالی راځي او په دغو کې د ښځو د ګډون امکانات شته.
د نوموړي پر وينا، .
شهزاده زياته کړه، چې د سولې خبرو اترو د بریاليتوب له پاره یو ملي اجماع ته اړتيا ده، چې د طالبانو سياسي مشارکت، اختلافي مواردو، د اتباعو حقوق، د بهرنيو ځواکونو پر وتلو او نورو باندې يوې هوکړې ته ورسېږو.
همدارنګه ده تېره ورځ هم سلام وطندار ته ویلي وو، چې د سولې خبرو اترو په دویمه ناسته کې به د نورو خبرو ترڅنګ په عمومي اوربند هم خبرې وشي.
اخوا پاکستاني ژورنالیستان وايي، چې په پاکستان کې د طالبانو پر مشرانو د دغه هېواد د پوځ له لوري چاپې اچول پيل او د دوی ټپيان او خپلوان هم له روغتونو ویستل شوي دي.
له بل لوري يو بل چارواکي ويلي، که چېرې ټولې خواوې ومني، نو چين هم د خبرو اترو په برخه کې د لا زیاتو همکاريو لپاره چمتو والی لري.
د چين د بهرنيو چارو وزارت له لوري په خپره شوې خبرپاڼه کې راغلي، چې چين چمتو دی، چې د افغانستان د سولې په پروسه کې رغنده رول ولوبوي.
که څه هم پخوا پر پاکستان د بې اعتمادۍ تورونه خورا زيات وو، خو په دې وروستيو د پاکستان ځېنو عملي ګامونو بیا دغه فضا بدله کړې او رښتيني سولې ته د افغانانو هيلې زياتې شوې دي.
