د بهرنیو چارو وزارت له پاره د صلاح الدین رباني ټاکل کېدل او د ملي دفاع وزارت ته د ځای ناستي وزیر په توګه د معصوم ستانګزي غوره کېدل، د دې لامل شول، چې د سولي عالي شورا د ریاست له پاره تشه رامنځته شي.
د سولې د عالي شورا غړی عبدالخالق پشه يي سلام وطندار سره په خبرو کې وویل، چې د سولې د عالي شورا د رییس د نشتوالي په صورت کې د افغان دولت او طالبانو تر منځ د سولې خبرې اترې په ټپه ولاړې دي. د پشه یي پر وینا، د طالبانو څو ډلې کېدل؛ د خبرو اترو ښه موکې وه، خو د رییس نشتوالي ټول کارونه له ستونزو سره مخ کړل.
پشه يي همداراز وویل، چې د سولې د عالي شورا د ریاست او د دارالانشاء د چوکیو د تشوالي راپه دې خوا د سولې د عالي شورا او طالبانو تر منځ هیڅ خبرې نه دې شوي.
د پشه يي پر وینا، اوسني شرایط د سولې د خبرو اترو له پاره بهترینه موکې ده، ځکه چې چین او پاکستان د خبرو اترو له پاره کوربتوب ته چمتو دي او له همدې فرصتونو باید ښه ګټه واخیستل شي.
په ورته وخت کې د ولسمشر غني ویاند سیدظفر هاشمي سلام وطندار ته وویل، چې د سولې د عالي شورا له پاره د رییس پر غوره کولو خبرې روانې دي او ډېر ژر به د دې شورا رییس معرفي شي.
خو ځېنې سیاسي کارپوهان په دې نظر دي، چې د سولې د عالي شورا لګښتونه د دې ریاست له کارونو سره د پرتلې وړ نه دي. څه موده وړاندې د سولې د عالي شورا یو غړي په بغلان کې ویلي وو، چې په وروستیو کې د سولې عالي شورا او طالبانو تر منځ د خبرو پر سر شاوخوا ۱۳ میلیونه لګښت راغلی دی.
