په غور کې د ښځو حقونو فعالانې د دغه ولایت په عدلي او قضايي بنسټونو کې د ښځينه قاضي او څارنوالانو له نه شتونه شکایت کوي.
د دې ولایت د ښځو حقونو فعالو سلام وطندارته وویل، د ښځينه قاضي او څارنوالانو نه شتون د دې لامل شوی، چې د ښځو ډېرې دوسیې له څېړلو پاتې شي.
د دغو مېرمنو په خبره، په عدلي او قضايي بنسټونو کې د مېرمنو نه شتون په دغه ولایت کې د ښځو په حقونو منفي اغېزه کړی دی.
غور ولایت کې د ښځو حقونو فعالې صدیقه ناصري سلام وطندارته وویل، په عدلي او قضايي بنسټونو کې د ښځينه قاضي او څارنوالې نشتون له امله مېرمنې خپلې ستونزې نارینه څارنوالانو ته نه شي وړاندې کولای.
دغه راز د مېرمنو حقونو یوه بله فعاله ماجبین رسا وايي، د ښځينه قاضي او څارنوالې نه موجودیت لویه ستونزه ده.
مېرمن رسا له مرکزي حکومته غواړي، چې د غور په عدلي او قضايي بنسټونو کې دې ښځې وګومارل شي؛ ترڅو د نورو ښځو ستونزې هوارې شي.
غور ولایت کې د ښځو چارو رییسه معصومه انوري هم په عدلي او قضايي بنسټونو کې د ښځينه کار کوونکو له نه شتون شکایت کوي.
د مېرمن انوري په خبره، د ټولنې ځينو رواجونو له امله مېرمنې نه شي کولای په عدلي او قضايي بنسټونو کې نارینه څارنوالانو او قاضیانو ته خپلې ستونزې وړاندې کړي.
د غور د استیناف څارنوالۍ رییس عبدالمعروف فایق سلام وطندار ته وویل، سره له دې چې د ښځينه قاضيانو او څارنوالانو له نه شتون سره مخ دي، خو د مېرمنو دوسیې نارینه څارنوالان په جدي توګه څېړي.
فایق وايي، هغه مېرمنې چې د څارنوالۍ په برخه کې يې لوړې زدهکړې کړې وي کولای شي د دغه ولایت په اړونده اداره کې دنده ترسره کړي.
په همدې حال کې د دغه ولایت د ښځو حقونو فعالانې وايي، په دې وروستیو کلونو کې غور یو له هغو ولایتونو شمېرل کیږي، چې په عدلي او قضايي بنسټونو کې د ښځینه څارنوالۍ د نه موجودیت له امله د مېرمنو دوسیې بې برخلیکه پاتې شي.
