په افغانستان کې د سره صلیب نړیوالې کمېټې مسوولین وايي، په جوزجان ولایت کې د دې کمېټې د شپږو کارکوونکو وژنې له امله دوی خپل فعالیت وځنډولو.
د جوزجان ولایت قوش تپې ولسوالۍ په ترکمن قدق سیمه کې د وروستیو واورو له امله زیانمنو کورنیو د سروې پرمهال د ناپېژاندو وسله والو برید په پایله کې د سره صلیب نړیوالې کمېټې شپږ کارکوونکي ووژل شول او دوه نور تري تم دي.
له دغه برید ورووسته د سره صلیب نړیوالې کمېټې افغانستان کې د بشري مرستو لړۍ بنده کړه.
افغانستان کې د سره صلیب کمېټې ویاند رامین ایاز سلام وطندار ته وویل، چې دوی د بریدګرو په اړه د رڼو څېړنو غوښتنه کوي.
ایاز وايي، چې سره صلیب د افغانستان په ټولو ولایتونو کې د خپلو کار کوونکو سفرونه د لنډې مودې له پاره ځنډولي دي.
د سره صلیب نړیوالې کمېټې دا هم ویلي، افغانستان ورته مهم دی او دوی هڅه کوي، چې د مرستو رسونې فعالیتونه بېرته پیل کړي.
په افغانستان کې د سره صلیب پر کار کوونکو برید کلک غبرګونونه هم درلودل.
اجرایوي رییس عبدالله عبدالله د برید غندنې ترڅنګ یې بریدګر د افغانانو دوښمنان بللي دي.
د اروپايي ټولني بشري مرستو او بېړنيو پېښو سره مبارزې کمېشنر کرسټوس سټايليانديس په يوه اعلاميه کې ويلي، دغه بريد د بشري حقونو له نړيوال قانون څرګنده سرغړونه ده.
د ده پر وينا، دغه بريد په افغانستان کې نه يوازې د بشرپالنې په برخه کې خطرونه مطرح کوي، بلکې د هغو کسانو سرښېندنه هم ښیي؛ چې د نورو د خدمت له پاره خپل ژوند له خطر سره مخ کوي.
اروپايي ټولني د جګړې پر ټولو ښکېلو غاړو غږ کړی، د بشر پالنې بنسټونه دې پرېږدي، چې له اړمنو او مصیبت ځپلو سره مرستې وکړي.
