د افغانستان کرکټ بورډ د یوې خبرپاڼې په خپرولو سره وایي، چی په کابل کی د زونونو ترمنځ د ځوان کرکټرانو په ګډون سیالۍ پیل شوي.
د کرکټ بورډ خبرپاڼه لیکي، دغه سیالۍ ۵۰ اوریزه دي، پکې بند امیر لومړۍ لوبه له مس عینک سره ترسره کړه.
د ورکړل شویو معلوماتو له مخې دغه سيالۍ به د پنځوو زونونو سپین غر، بند امیر، بوست، امو او مس عینک منتخب اتلس کلنو کرکټ لوبډلو ترمنځ به يوه اونۍ دوام وکړي.
ویل کیږي، چې دغه سیالۍ به د یوې اونۍ له پاره د کابل په نړېوال کرکټ او دغه راز د احمد شاه بابا مېنې په سلیم کاروان کرکټ لوبغالي کی ترسره شي.
کرکټ بورډ د خپل عمومي مشر نسیم الله دانش او اجرایوي مشر شفیق الله ستانکزي له قوله لیکي، چې د دې سیالیو موخه د کرکټ بنسټیزه وده ده.
دوی وايي، داشان سیالۍ کولای شي، افغان کرکټ ټاکوونکي ډلګۍ ته داسې ځوان استعدادونه ور وپېژني، چې ترې په نړېواله کچه ګټه اخیستل کېدای شي.
د یادونې وړ ده، چې د تېرې یوې میاشتې راهیسې افغان کرکټ بورډ د هېواد په بېلا بېلو زونونو کې د ۱۸ کلنو کرکټرانو د لټون ازموینې پېل کړي دي.
د دې لټون په پاېله کې به د هر زون څخه غوره لوبغاړي و پېژندل شي او بیا به یې د زنونو منتخبو ۱۸ کلنو کرکټ لوبډلو کې جذب کړای شي.
ياده دې وي، کرکټ بورډ تراوسه دا نه دي ویلي، چې ایا اتلس کلنه کرکټ ملي لوبډله به هم د افغانستان د نورو ملي ۱۹ کلنو او ښکته عمر لرونکو لوبډلو په څېر په اسیایي سیالیو کې ګډون وکړي او کنه ؟
