د ننګرهار والي ګلاب منګل وايي، چې پهدې ولایت کې د دولتي اشخاصو له وسلو او پېژندکارتونو نه په استفادې، وسلهوال دولت ضد کړنې ترسره کوي، چې له امله یې د ننګرهار په ولسوالیو او مرکز جلالاباد کې ناامني زیاته شوېده.
نوموړی دا څرګندونې داسې مهال کوي، چې د ننګرهار پر ولسوالیو سربېره د جلالاباد په ښار کې هم ولسي وګړي، د هدفي وژنو، تښتونو او د وسلهوالو له ګواښونو سر ټکوي.
د ننګرهار والي په ټینګار سره زیاته کړه، چې د دې ولایت د نظامي شورا د پرېکړې پر بنسټ به له هغو کسانو وسلې واخلي، چې د وسلو ګرځولو قانوني اسناد ونهلري. د ده په خبره، وروسته لهدې غیرقانوني وسلې ګرځول په جدي ډول بندېږي.
والي دا هم وویل، چې د ننګرهار د یوې ولسوالۍ سیمهییزو پولیسو ته هم د دې اجازه نهورکول کېږي، چې د خپلې دندې له سیمې جلالاباد ښار ته وسلې یوسي.
ولسي وګړي هم د ننګرهار په ولسوالیو او جلالاباد ښار کې د نامسوولو وسلهوالو ډلو له موجودیته په اندېښنه کې دي، وايي، دغې چارې هدفي وژنو، تښتوونو او ننګرهار کې ناامنۍ ډېرې کړېدي.
صفتالله د جلالاباد ښار د ۴ ناحیې اوسېدونکی وايي، په ښار کې ډېرې داسې غیرمسوولې وسلهوالې ډلې ګرځي، چې دوی یې له دوست او دوښمن سره توپیر نهشي کولی.
میرویس خان د ښار بل اوسېدونکی دی، چې د غیرمسوولو وسلهوالو له ډېرېښته اندېښنه ښيي او زیاتوي، حکومت د دې حالت پوښتنه نه کوي؛ که یې کولی؛ ناامني به نه ډېرېدله.
دوی وړاندیز کوي، چې دولت باید چوکونو کې اړوند ارګانونه ودروي اولهدوی پوښتنه د دا ډول ګرځېدلو هدف څه دی.
ولسي وګړي همداراز زیاتوي، چې له حکومت سره د داعش او وسلهوالو طالبانو پر مخامخ جګړو سربېره، ننګرهار کې نامسوولو وسلهوالو ډلو حکومت ته د سرخوږي جوړولو تر څنګ د ولسي وګړیو ژوند هم له ستونزو سره مخ کړیدی.
