د افغان ـ ترک ښوونځیو د زدهکوونکیو کورنۍ وايي، یو دولت ته د یو نادولتي بنسټ سپارل هغه هم له کوم حقوقي دلیل پرته د افغان دولت د ټولو قوانینو خلاف کار دی.
د ترکیې دولت ته د افغان ـ ترک ښوونځیو د مدیریت سپارلو په غبرګون په دویمه ورځ هم د زدهکوونکیو کورنۍ واټونو ته راووتلې او د افغان او ترکیې حکومتي چارواکیو د جوړجاړیو پرضد یې شعارونه ورکړل.
د دغو ښوونځیو مدیریت تېره ورځ رسما ترکیې دولت ته وروسپارل شو او دغه پرېکړه د اقتصاد، پوهنې، بهرنیو چارو او عدلیې وزارتونو او د ملي امنیت شورا او د ملي امنیت لوی ریاست ګډ کمېسیون لهخوا شوې ده.
د زدهکوونکیو د کورنیو د کمېټې یو غړي وویل، که د زدهکوونکیو، د زدهکوونکیو والدینو او د استادانو قانوني غوښتنو ته پاملرنه ونه شي؛ خپل شکایتونه به قضايي بنسټ ته یوسي.
تېره ورځ د ترکیې د پوهنې وزیر عصمت یلماز د ښوونځیو مدیریت لېږد مسوولیت په غونډه کې وویل، له دې وروسته د افغان ـ ترک ښوونځیو کیفیت به له دې هم زښت ښه او د ښوونځیو شمېر به یې هم زیات شي.
خو د دغو ښوونځیو ځینې زدهکوونکي وايي، د ترکیې دولت ته د دغو ښوونځیو د مدیریت له سپارلو وروسته هېڅ ضمانت نهشته چې د ښوونځیو د کیفیت سطحه لوړه وساتل شي.
د افغان ـ ترک ښوونځیو د زدهکوونکیو کورنیو یوبل سره ژمنه وکړه، ترهغو چې غوښتنې یې ونه منل شي مدني اعتراضونو ته به دوام ورکړي.
