د هلمند ولایت سیمه ییز چارواکي وايي، چې په دغه ولایت کې يې د مخالفيتو پرضد د نويو عملیاتو ترسره کولو له پاره پلان جوړ کړی او ډېر ژر به عملي شي.
خو په دې اړه بیا په هلمند کې د بشري حقونو خپلواک کمېسيون د ملکي مرګ ژوبلې په ډيروالي انديښنه څرګندوي او وايي، چې په دغو عملياتو کې زیات ملکي وګړو ته مرګ ژوبله اړول کيږي.
دغه بنسټ نن چهارشنبه (فبروري ۳مه) د يوې خبري ناستې پرمهال وويل، چې نوي پلان شوي عمليات بايد په داسې ډول ترسره شي، چې په بشپړه توګه په کې بشري حقونو او همدا راز د ملکي مرګ ژوبلې د مخنيوي له پاره جدي پام وشي.
ددغه بنسټ په وينا، يوازې د تيرې ليندۍ په مياشت کې د روانو جګړو په ترڅ کې په هلمند کې سلو ملکي وګړو ته مرګ ژوبله اوښتې، چې مسؤلين بايد د نويوترسره کيدونکوعملياتوپرمهال دې ټکو ته ډيره پاملرنه وکړي.
خو چارواکي د ملکي مرګ ژوبلې په وسله والو مخالفينو اچوي او وايي، چې د عملياتو له پاره يې منظم پلانونه د ټول ولايت په کچه جوړکړي دي.
په هلمند کې د بشري حقونو د خپلواک کمیسيون ځايي مسؤل محمد بلال صديقي وايي، نه يوازې په دې ولايت کې د ښځو او ماشومانو حقونو ته پاملرنه نه کيږي، بلکې نورې سرغړونې هم ترسره کيږي، چې په دې لړ کې د جګړو پرمهال ملکي خلکو ژوند ته نه پاملرنه هم دوی ته د انديښنې وړ ده.
خو چارواکي د بشري حقونود خپلواک کمیسيون دا ادعا نه مني او وايي، چې وړاندې هم د دوی له خوا د ملکي خلکو ژوند ته پوره پاملرنه شوې او د ګوتو په شميرکسان يوازې د وسله والو طالبانو له خوا په خښ کړل شويو ماينونو کې زيانمن شوي دي.
د هلمند والي ميرزاخان رحيمي سلام وطنداره ته وويل، د نويو عملياتو له پاره يې هم منظم پلانونه جوړکړي، په پوځي برخه کې ټولې اړتياوې پوره شوې او جوړشوي پلانونه به د ټول ولايت په کچه پلي کيږي.
هغه وايي، په عملياتوکي به د ملکي مرګ ژوبلي ته ډيره پاملرنه کيزي.
نوموړی زیاتوي، له دې وړاندې هم په ډيريو عملياتو کې ورته کار ترسره کيده.
هغه که څه هم د عملياتود پيل نيټه نه په ډاګه کوي، خو وايي له هرڅه وړاندې د ستونزو حل د سولې له لارې غوره بولي او له وسله والومخالفينوغواړي، چې دې ټکي ته پام واړوي.
هلمند کې د بشرحقونوخپلواک کميسیون په داسې حال کې د جګړې پرمهال ملکي مرګ ژوبلې د مخنيوي غوښتنه کوي، چي ويل کيزې له همدې جګړو نه زرګونه کورنۍ لښکرګاه ښارته راکډه شوي او تردې دمه د سرپناه د نه شتون سره سره له ګڼو نورو ستونزو کړيزي.
