ولسي جرګې نن (چهار شنبه) د یوې خبرپاڼې په خپرولو سره له ملګرو ملتونو غوښتي، چې د افغانستان او پاکستان تر منځ موجودې لانجې ته دې د پای ټکی کېږدي.
په دې خبرپاڼه کې راغلي، ولسي جرګې له ټولو نړیوالو مرستندیانو غوښتي، چې د افغانستان سره په لاسلیک شوې امنیتي هوکړې دې عمل وکړي او د افغانستان د خلکو او له دې هېواده دې د پاکستان د تېري په وړاندې د افغانانو دفاع او ملاتړ وکړي.
ولسي جرګې له حکومت نه غوښتي، چې د ګاونډیانو د هر ډول مغرضانه سرغړونو مخه دې ونیسي؛ د ځمکنۍ بشپړتیا او د ملي ګټو د دفاع له پاره دې ودریږي.
د ولسي جرګې په نننۍ غونډه کې په دې ټینګار وشو، چې د دواړو هېوادونو تر منځ موجوده ستونزه دې د ډېپلوماتیکو خبرو له لارې حل شي.
وکیلانو د تورخم په صفري سیمه کې د پاکستان له خوا د نظامي تاسیساتو جوړول د ټولو نړیوالو اصولو خلاف وبلل او د پاکستان د سرحدي قوې له لوري یې په افغان سرحدي ځواکونو برید وغنده.
د ولسي جرګې دویم مرستیال نعمت الله غفاري له حکومت ته وغوښتل، چې د تورخم موضوع دې په خورا جدیت سره تعقیب کړي.
له بل لوري د ولسي جرګې غړې شینکۍ کړوخېل وویل، چې د افغانستان درې ګونې قواوې دې د تورخم په مسله کې یو واحد دریځ ولري.
د خلکو استازو د پاکستان یرغلګر پوځ په مقابل کې د افغان پوله ساتو ځواکونو غبرګون وستایه او له حکومت ته یې وغوښتل، چې د هغو سرتېرو کورنیو ته دې جدي پام وکړي، چې په دې نښته کې قرباني شوي دي.
په ورته وخت کې د سمون له پاره د ځوانو فعالانو شبکې په کابل یوې خبري غونډه کې او په هرات کې د دې ولایت خلکو او مدني فعالانو د لاریون په ترڅ کې له افغان امنیتي ځواکونو ملاتړ وکړ.
د افغان پوله ساتو ځواکونو او پاکستاني سرحدي ځواکونو تر منځ د یک شنبې ورځ (۴مه، د غبرګولي) هغه مهال نښته پیل شوه، چې د پاکستان سرحدي ځواکونو د تورخم په صفري سیمه کې نظامي تاسیسات جوړول او د افغان سرحدي پولیسو له ممانعت سره مخ شول.
