په رسنیو کې د جنډر توازن چې د کلید ګروپ له لوري د هېواد په ۹ ولایتونو کې شوې، ښيي چې د رسنیو په ښځینه کارکوونکیو کې د پښتنو ونډه کمه ده.
د دې سروې له مخې، مخکې د هېواد په رسنیو کې د ښځینهوو شمېر نږدې ۲ زره وو، خو اوس دا شمېر ۱۷ سوو ته راټیټ شوی چې ۷۷۰ یې مسلکي کارکوونکې دي.
د کلید ګروپ سروې چې نن په یوې خبري غونډې کې وړاندې شوې، ښيي چې د رسنیو ښځینه کارکوونکیو له ډلې ۸۷ سلنه دري ژبې، ۷ سلنه یې پښتنې، ۲ سلنه یې اوزبېکې او ۴ سلنه یې د نورو ژبو ویونکې دي. دغه راز ۳۲ سلنه یې مېرمنې، ۶۷ سلنه پېغلې او یوازې یوه یې هم طلاقه شوې وه.
د کلید ګروپ یوه کارکوونکي محمود مبارز وویل چې ښځینه کارکوونکې په رسنیو کې ډېره موده کار کولی نهشي او ۴۸ سلنه یې له ۱ کاله تر ۳ کلونو، ۲۲ سلنه یې تر یو کال کمه، ۲۵ سلنه له ۳ تر ۱۰ کلونو او ۵ سلنه یې هم له ۱۰ کلونو ډېره کاري تجربه لري.
د نوموړي په وینا، ټولنیزې او کلتوري محدودیتونه په رسنیو کې د پښتنو ښځینه کارکوونکیو د شمېر کموالي لامل شوي دي.
دغه سروې په کابل، خوست، ننګرهار، بلخ، هرات، کندهار، بغلان، کندوز او بدخشان ولایتونو کې شوې ده.
په همدې حال کې د کلید ګروپ مشره نجیبه ایوبي وایي، د هېواد په ۹ ولایتونو کې یې سروې کړې چې له مخې یې په کابل، بلخ او هرات ولایتونو کې د نورو هغو په پرتله رسنۍ ډېرې ښځینه کارکوونکې لري.
سروې ښیي چې د ښځینه کارکوونکیو په ډله کې ۴،۲۹ سلنه یې ماسټرانې، ۶۷،۱۴ یې لیسانسه، ۱۸،۵۷ یې تر بکلوریا لوړې او ۸،۵۷ سلنه نورې یې تر بکلوریا زده کړې لري.
د سروې مالومات ښیي چې د رسنیو په مدیریتي برخه کې هم د ښځینهوو ونډه کمه ده چې ۲۱سلنه یې ټیټپوړې، ۶۵سلنه یې د منځنۍ کچې او یوازې ۱۴ سلنه یې لوړپوړې کارکوونکې دي.
د کلید ګروپ مسوولان وايي، د دوی د سروې پرمهال د رسنیو ښځینه کارکوونکیو ویلي چې د نارینهوو او ښځینهوو تنخاګانې مساوي دي، خو ۴۷سلنهوو ویلي چې توپیر لري او پاتې ۹ سلنه یې ناخبرې دي.
د یادې سروې له مخې د رسنیو ۸۷سلنه ښځینه کارکوونکیو ویلي چې له جنسي ځور سره مخ شوې نهدي، خو ۹ سلنهوو یې ویلي چې جنسي ځور ورکول شوی او ۴سلنهوو یې بیا ویلي چې جنسي نه، بلکې نور ځور ورکړل شوی دی.
