وژل شوی کس مولوي شاهد الله شاهد نومېدلو او د داعش په تشکیلاتو کې مهمه څېره بلل کېدله.
شاهد د داعش ډلې له لومړیو هغو کسانو څخه و، چې د عراق او شام د اسلامي دولت له خلیفه ابوبکر البغدادي سره یې بیعت وکړ او د هغه تر مشرۍ لاندې د داعش له خوا د نومول شوي ولایت خراسان په ځېنو برخو کې وسله وال فعالیتونه پیل کړل.
د ملي امنیت عمومي ریاست د یوې خبرپاڼې په خپرولو سره لیکلي، چې د ننګرهار په اچین ولسوالۍ کې د بهرنیو ځواکونو په هوایي برید کې د داعش ډلې دویم کچ مشر ګل زمان او جهادیار د له منځه تلو تر څنګ د دې ډلې مهم غړی مولوي شاهدالله شاهد هم وژل شوی.
شاهد الله شاهد چې په شیخ مقبول مشهور و؛ پخوا د تحریک طالبان پاکستان ویاند و او له (ټي ټي پي) څخه تر جلاکېدو وروسته یې له داعش ډلې سره یوځای شو.
شاهد الله شاهد هوډمن و، چې په یوه ستره جګړه کې له ځان نه د دې ترهګرې ډلې یوه مهمه سیمه ییزه څېره جوړ کړي.
له دې پېښې دوه ورځې وړاندې د ننګرهار په اچین او کوټ ولسوالیو کې د بې پيلوټه الوتکو په بریدونو کې ۶۱ داعش پلوه وسله والو د وژل کېدلو خبر ورکړل شوی و.
په ورته وخت کې افغان امنیتي چارواکو په وار وار سره ویلي، چې دوی د داعش پر وړاندې غلي نه دي ناست او د داعش د ځپلو لپاره یې د افغان امنیتي ځواکونو ځانګړې ډلګۍ جوړه کړې ده.
د ملي امنیت له لوري په تازه یوه خپره شوې ویډیو کې د دغې ځانګړې ډلګۍ فعالیتونه او د داعش پر خلاف ځانګړي عملیات ښودل کېږي.
په دغې ویډیو کې څو ځایه لیکل شوي: "داعش د اسلام پر لمن تور داغ دی" او همدا ډول لیکي: "افغانستان د داعش ځای نه دی."
له ملا عبدالروف خادم وروسته چې څو میاشتې وړاندې په هلمند ولایت کې د بهرنیو ځواکونو په برید کې وژل شوی و، د شاهد الله شاهد وژل کېدل په افغانستان کې د داعش ډلې دویم ستر قومندان وژل کېدل دي.
شاهد د حافظ سعید اورکزي تر مشرۍ لاندې د داعش په لیکو کې په جنګي او تبلیغاتي کارونو بوخت و.
