د داعش ډلې د «جګړې وزیر» ووژل شو

د اسلامي دولت (داعش) وسله والې ډلې لوړپوړی قوماندان ابو عمر الشیشاني، چې د دې ډلې وسله والو کسانو ورته د «جګړې وزیر» نوم ورکړی و، په سوریه کې د امریکا هوايي ځواکونو په برید کې ووژل شو.

الشیشاني د ابوعمر چچني په نوم یادېده، د دعش وسله والې ډلې د مشر ابوبکر البغدادي باوري شخص بلل کېده.

د ده نوم د امریکا د ملي امنیت ادارې په تور لیست کې شامل و.

پنټاګون د عمر چچني په اړه د هرې هغې اطلاع په ورکولو، چې د عمر چچني د نیول کېدو او وژل کېدو لامل کېدلی ۵ میلیونه ډالرو جایزه اعلان کړې وه.

د سوریې په جګړې کې یو امریکايي مسوول جنرال ویلي دي، چې د الشیشاني وژلو له پاره امریکايي او ایتلافي ځواکونو څو ځلې هوايي بریدونه کړي و، چې بلاخره ووژل شو.

دی وايي، چې الشیشاني د سوریې په الشدادي ښار کې وژل شوی دی.

د پنټاګون ویاند پېټر کوک ویلي دي، چې د امریکايي څېړنیزې ډلې د سوريې د الشدادي ښار د برید په اړه پلټنې کوي او زیاتوي، چې د امریکا دفاع وزیر ډاډمن دی، چې د برید پایله به مثبته وي.

کوک وویل، د الشیشاني وژنه د داعش وسله والې ډلې په نظامي مدیریت کې د بې نظمۍ لامل کېږي او په چیچنیا سیمه کې د دې ډلې د سرتېرو په جلب او جذب کې کموالی راولي.

د الشیشاني اصلی نوم  (Tarkhan Tayumurazovic Batirashvili)و او په ۱۹۸۶ کال کې په ګرجستان کې زېږېدلی و.

نوموړي یو وخت د شوروي اتحاد په خلاف جنګ کاوه او له هغې وروسته تر ۲۰۰۶ کال پورې د ګرجستان اردو سره یوځای شو.

خو له څه وخت دندې وروسته د وسلو له منځه وړلو او فساد له کبله زنداني او د ګرجستان اردوله لیکو وباسل شو.

الشیشاني د زندان له خلاصون وروسته سوریې ته لاړ او هلته د داعش وسله والې ډلې سره یو ځای شو.