دغه پُل د خوست ولایت په علي شېرو او تېرزیو ولسوالۍ کې د ۱۰۰ مترو په اوږدوالي او ۸ مترو په پلنوالي جوړیږي، چې په دې سره به د خلکو ترانسپورتي ستونزې راکمې شي.
چارواکي وايي، دغه پل د نړیوال بانک په مالي ملاتړ د شاوخوا ۸۱ ميليونو افغانيو په لګښت جوړیږي.
ددغه پله جوړول به یو کال و خت ونیسي.
د خوست مرستیال والي عبدالواحد پټان نن د (اپریل په ۱۳مه) په سیمه کې په دې اړه جوړو شویو مراسمو ته وویل، د دغه خوړ دواړو غاړو ته پراته خلک له ډېرو ستونزو سره مخ وو، چې د دې پله په جوړېدو سره به يې ستونزې لرې شي.
د فوایدې عامې رییس انجینیر مامور شاه وویل، چې د دې پُل په جوړېدو سره به د صبریو، باک او ځاځي میدان ولسوالۍ خلک هم د ضرورت په وخت کې ګټه واخلي.
د سیمي یو تن قومي حاجي افضل جان د پُل د اهمیت په اړه وویل، د دې لارې څخه د ورځې په جریان کې سلګونه موټر تګ او راتګ کوي.
همداشان د دې سیمي خلک د خوست ښار سره نښلوي، ده وویل د پل د نشتوالي له امله د سیلابونو د راووتلو پر مهال د دې سیمي خلک له زیات شمېر ستونزو سره مخ وو.
دده په خبره چې داسې هم شوي د سیلابونو د راوتلو پر مهال د خلکو جنازي او ودنه له یوې ورځې نه، بلې ته پاتي شوي.
