د غزني بزګران د ابو له کمښت سره مخ دي

د غزني ولایت یو شمېر بزګران او کروندګر وايي، چې د دې ولایت د اوبو ځینې بندونه تخریب شوي او حکومت یې بیاجوړولو ته پام نه دی کړی.

دوی وايي، ۶۲ زره کورنۍ د اندړو ولسوالۍ له سردې بند او د خواجه عمري ولسوالۍ له سلطان بند ګټه اخلي؛ حکومت د دغو بندونو ویجاړو شویو برخو بېرته رغولو ته هېڅ پام نه دی کړی.

د غزني ولایت یو شمېر کروندګرو سلام وطندار ته وویل، سلطان بند شاوخوا ۱۲ کاله مخکې د طبیعي پېښې له امله یوه برخه یې تخریب شوې ده او اوسمهال په سم ډول اوبه نه ذخیره کوي.

د سید حسین په نوم یو بزګر سلام وطندار ته وویل، چې د اوبو نه شتوالي له کبله یې ژورې څاګانې جوړې کړي، خو بیا هم د ابو کمښت ستونزه یې نه ده حل شوې.

اجمل یو بل بزګر دی وايي، چې د سلطان بند له ماتېدو راهیسې په غزني ولایت کې کروندې د اوبو له کمښت سره مخ دي او د خپلو کروندو حاصلات بېرته په ابو خور مصرفوي.

د غزني ولایت د کرنې او مالدارۍ رییس عبدالله تسل د سردې او سلطان بند د دې  ولایت د اقتصاد او کرنې ودې په برخه کې خورا مهم بولي او وايي، چې که دغه بندونه ورغول شي، د بزګرانو او بڼوالو حاصلات به دوه برابره زیات شي.

تسل وايي، د بزګرانو او بڼوالو له خوا د ژور څاګانو کیندل په راتلونکي کې د اوبو ځمکنۍ چینې له ګواښ سره مخ کوي.

د غزني ولایت د ولاړو ابو رییس شفیق جهان یار وویل، د امنیتي ستونزو له امله د اوبو بندونو بیارغونه، ونه شوه؛ خو اوسمهال سردې بند ۹۹ سلنه فعال شوی او د سلطان بند د دویمې برخې جوړولو چارې روانې دي.

د غزني ولایت د ولاړو اوبو د ادارې د معلوماتو له مخې د سلطان اوبو بند د ۱۵ هکټاره ځمکې خړوبولو او سردې بند د ۴۰ زره جریبه ځمکې خړوبولو ظرفیت لري.