د سوداګرۍ او صنایعو وزارت معین مزمل شینواري د مشرانو جرګې غونډه کې وویل، چې د افغانستان او پاکستان هېوادونو ترمنځ د سوداګرۍ په برخه کې د لاسلیک شوي اپټا تړون موده پای ته رسېدلې ده.
شینواری وايي، چې دغه تړون به هغه مهال له پاکستان هېواد سره تمدید کړو، چې د سوداګرۍ په برخه کې پرتې ستونزې د پاکستان له خوا حل شي.
افغانستان او پاکستان دغه تړون په ۲۰۱۰ م ز کال کې په دې موخه لاسلیک کړی و، چې افغانستان ترانزیتي موټر دې د پاکستان بندرونو او د هغه هېواد موټر دې د منځنۍ اسیا په ګډون د افغانستان له پولو لاړ شي.
خو افغان چارواکي او د سوداګرۍ خونو مسولین وايي، چې پاکستان د افغانستان موټر د پېښور څخه هاخوا نه پرېږدي.
نوموړي جرګې ته وویل، چې د اصولو له مخې د سوداګري وزارت چارواکو د پاکستان هېواد چارواکو ته یوه میاشت مخکې د اپټا تړون د مودې له پای ته رسېدو وړاندې خبر ورکړی دی.
د سوداګرۍ او صنایعو وزارت معین د مشرانو جرګې په نننۍ (یکشنبې) غونډه کې وویل، چې افغانستان ته د سوداګرۍ نړیوال سازمان غړیتوب به تر ډېره بریده د سوداګرۍ په مخ کې جوړ شوي خنډونه او په تېره بیا د پاکستان سره د ترانزیټ په برخه کې حل شي.
شینواري وکیلانو ته د اپټا ترڅنګ د سوداګرۍ نړیوال سازمان کې د افغانستان غړیتوب په اړه معلومات ورکړل.
ده وویل، چې دغه غړیتوب به د افغانستان د سوداګرۍ برخې ستونزې حل او زیاته یې کړه، امریکا، چین، کاناډا او چاپان هېوادونو له دوی سره ژمنه کړې ده، چې په تخنیکي برخو کې به مرستې وکړي.
د سوداګرې وزارت د چارواکو په خبره، دغو هېوادونو د ګمرکونو او ترانسپورټ په برخه کې د مرستوکولو ژمنې کړي دي.
مزمل شینواري وویل، چې هغه مهال به افغانستان د سوداګرۍ نړیوال سازمان بشپړغړیتوب تر لاسه کړي، چې د افغانستان او د سازمان غړیو هېوادونو له خوا دغه غړیتوب تصویب شي.
دا په داسې حال کې ده، چې د اپټا د تړون لاسلیکېدو وروسته بیا هم د سوداګرۍ خونو چارواکو په وار وار د پاکستان له حکومته شکایتونه کړي، چې د افغانستان مالونه د پاکستاني ملېشو له خوا درول کيږي او په بېلابېلو پلمو له افغان سوداګرو څخه پېسې اخلي.
