دغه نندارتون، چې نن یک شنبه (ډسمبر۶مه) د کابل د دارالامان ماڼۍ سره د افغانستان د عدالت غوښتونکي انجمن له خوا جوړ شوی و تر ۳۰۰۰ ډير انځورونه نندارې ته وړاندې شول.
د دې انجمن غړي زاهد سلام وطندارته وویل، چې د نندارتون موخه يې د بشري حقونو د نړیوالې ورځې لمانځلو ترڅنګ په افغانستان کې د څلورو لسیزو جنایتونو غندنه ده.
د قربانیانو دغه انځورونه به د دارالامان ویجاړې ماڼۍ پردیوالونو د درېیو ورځو له پاره ځوړندې وي.
د نندارتون مسولین وايي، چې په یاد نندارتون کې یې د هغو قربانیانو انځورونه نندارې ته ایښي چې د خلق، پرچم، مجاهدینو، طالبانو او د پخواني ولسمشر حامد کرزي د واکمنۍ پرمهال خلک په ظلم او ستم وژل شوي دي.
د عدالت غوښتنې ټولنیز بنسټ غړي زاهد داهم وویل، چې راتلونکې چهار شنبې په ورځ به د کابل زرنګار پارک څخه ترافشارو پورې د پخوانیو جنایتونو پروړاندې یو لاریون هم وکړي.
د دغه انجمن غړي وايي، چې د کمونیستي ريژیم د واکمنۍ پرمهال د څرخي پله پولیګون په سیمه کې سلګونه بې ګناه وګړي په ډله ییزه توګه ژوندي ترخاورې لاندې شول، چې د راتلونکې پنجشبنې په ورځ به یې په یاد هغه سیمې ته هم ورشي.
