د غزني ولایتي شورا غړي نصیر احمد فقیري سلام وطندار ته وویل، چې نن د (اګست په ۱۳مه) له غرمې وروسته د غزني – جاغوري پر لاره وسله والو کسانو د جاغوري ولسوالۍ ۷ تنه عام وګړي برمته کړي دي.
فقیري وايي، چې وسله والو دغه ۷ تنه عام وګړي، له موټرو راښکته کړي او له ځان سره وړي دي.
د غزني ولایت د امنیت امر اسدالله انصافي هم دا خبر تاييدوي او وايي، چې دغه کسان د قره باغ په سیمه کې وسله والو راښکته کړي دي.
هغه زیاته کړه، چې په دې اړه یې پلټنې پیل کړي دي.
په ورته وخت کې د جاغوري ولسوال ظفر شریف وايي، چې له دغو کسانو نه یوه ښځه او سپین ږیری راخوشی شوی دی. راخوشي کسان وايي، چې وسله والو ۷ کسه له موټر نه راکوز کړل او له ځان سره یې یوړل.
د راخوشې شوو کسانو په خبره، دغه پېښه له غرمې وروسته، د ماسپښن په ۴ بجو شوې ده.
دا په داسې حال کې ده، چې د تېرې سه شنبې په ورځ په همدې لاره نامعلومو وسله والو ۱۱ تنه عام وګړي برمته کړل او له ځانه سره یې یوړل.
همدارنګه نن وسله والو طالبانو د جاغوري ولسوالۍ ۴ تنه اوسېدونکي اسیر کړي او بیا یې وژلي وو.
تر اوسه هیڅ ډلې د دغو برمته شوو وګړو مسولیت پر غاړه نه دی اخیستی.
