د تخار درقد ولسوالۍ په شورعرب سیمه کې د عمري ښارګوټي بازار جوړولو چارې څو میاشتې مخکې پیل شوې وې، چې اوس طالبانو د دغه ښارګوټي بازار پرانیست.
د درقد ولسوالۍ یوشمېر اوسېدونکیو د نوم نه خپرولو په شرط سلاموطندار ته وویل، طالبانو د شورعرب بازار پرانیستی او د سیمې اوسېدونکي په زور اړباسي چې په دغه بازار کې راکړه ورکړه وکړي.
د تخار امنیې قوماندانۍ ویاند خلیل اسیر هم وایي چې د سیمې اوسېدونکي په شورعرب بازار کې چې طالبان یې اداره کوي راکړه ورکړه کوي.
د ښاغلي اسیر په وینا اوسمهال په دغه بازار کې ۲۰ هټۍ فعالې دي.
د سیمې اوسېدونکیو په وینا طالبانو په عمري ښارګوټي کې له ۶۰۰ د ډېرو هټيو جوړولو امر کړی دی او خلک په زور دې ته اړ کوي چې په دغه بازار کې هټۍ ونیسي.
اخوا طالب ویاند ذبیح الله مجاهد وایي د تخار درقد ولسوالۍ د شورعرب بازار د خلکو د اړتیاوو او غوښتنو پربنسټ جوړشوی دی او ټاکل شوې نور هم پراخ شي.
