د تخار اعتراض‌کوونکي: د برېښنايي تذکرو وېشلو بهیر دې بند شي

د تخار سلګونه اوسېدونکي نن سهار په برېښنايي تذکرو کې د افغان کلمې له لیکلو سره، د برېښنايي تذکرو وېشلو بهیر په غبرګون کې سړکونو ته راووتل.

اعتراض‌کوونکیو د «موږ افغانان نه یو»، «زموږ قومي هویت باید په برېښنايي تذکرو کې ولیکل شي» شعارونو په ورکولو سره د دې بهیر درولو غوښتنه وکړه.

د دې اعتراض‌کوونکیو له ډلې د تخار پخوانی والي اکرم کارګر او مدني فعال فرزاد مجیدپور وايي، برېښنايي تذکرې د یوې فاشیستي ډلې له لوري وېشل کیږي، چې باید دې برخه کې عمومي رایه په پام کې ونیول شي.

اعتراض‌کوونکیو یو ۴ ماده‌ییز پرېکړه‌لیک کې د ولسي جرګې د ۱۳۹۳ کال د مصوبې پر اساس د برېښنايي تذکرو وېشلو غوښتنه وکړه.

د تخار ولایتي شورا غړی عصمت قرباني وايي، د دې بهیر دوام هېواد د جګړې خوا ته بیایي او په وینا یې، نن یې یو مدني حرکت کړی؛ خو بله ورځ چمتو دي چې د جګړې ډګر ته هم لاړ شي.

دوی د مجاهدینو د حکومت ملي سرود خپور کړ او خراسان ته یې د افغانستان نوم اړولو غوښتنه وکړه.

له‌دې مخکې بلخ، بدخشان او پنجشېر ولایتونو کې هم په برېښنايي تذکرو کې د افغان کلمې د لیکلو په مخالفت لاریون شوی او ټاکل شوې راتلونکیو ورځو کې څوو نورو لویو ښارونو کې هم د برېښنايي تذکرو وېشلو بهیر په غبرګون کې لاریون وشي.