له ولسمشرۍ ماڼۍ څخه په خپرې شوې خبر پاڼې کې راغلي چې ولسمشر اشرف غني د بهرنيو ځواکونو له خوا د ملي اردو په سرتېرو شوی برید غندلی.
خبر پاڼه د ولسمشر له خولې کاږي چې بهرنيو ځوا کونو له خوا شوی برید یې د اندېښنې وړ ګڼلای او زیاته کړې یې ده چې بهرني ځواکونه دې په خپلو عملیاتو کې د خلکو ژوند خوندیتوب ته پاملرنه وکړي.
ولسمشر اشرف غني زیاته کړې چې په راتلونکې کې د بهرنيو ځواکونو دا ډول عملیات نه باید د ولسي وګړو او افغان امنیتي منسوبینو د مرګ ژوبلې سبب شي.
غني ټېنګار کړی چې بهرنیان دې پوځي عملیاتو کې له پوره احتیاط او پاملرنې کار واخلي.
دغه پیښه د لوګر ولایت اړوند برکي برک ولسوالۍ کې رامنځته شوې ده .
د بره کي برک ولسوال انجینیر محمد رحیم امین سلام وطندار ته د ټلیفون پر کرښه وویل، چې بهرنیو ځواکونو نن د دوشنبې په ورځ د سهار په ۷ بجو د بره کي برک ولسوالۍ په چلتن سیمه کې د ملي اردو پر یوې پوستې برید کړی او ۷ تنه سرتېرې یې وژلي دي.
بهرنيو ځواکونو تر اوسه ددې برید د څرنګوالي په اړه رسنيو ته معلومات نه دي ورکړي او نه یې هم په اړه کوم وضاحت کړی.
د ارګ پاڼه لیکي چې ولسمشر غني د پېښې د څرنګوالي او څېړنې په اړه یو پلاوی ټاکلی چې له نږدې یې و څيړي.
دغه برید په ټولنیزو ررسنيو کې هم خورا توند غبرګون له ځان سره درلود، او ددې پيښې د عاملينو د محاکمې غوښتنه یې کړې ده.
دا لومړی ځل نه دی چې د بهرنيو ځواکونو په بریدونو کې امنتي منسوبینو یا عام ولسي وګړو ته مرګ ژوبله اوړي د پخواني ولسمشر حامد کرزي او امريکا حکومت ترمنځ د اختلاف او د امنيتي تړون د نه امضا کولو یو علت همدا پوځي عملیات په ګوته کېدل چې له امله یې مرګ ژوبله رامنځته کېدله.
