د غور يو شمېر دولتي سرچينې د نوم د نه خپراوي په شرط سلاموطندار ته وايي چې تېره ورځ ماښام د غور مرغاب ولسوالۍ نه ټول امنيتي ځواکونه ووتل او دولتيار ولسوالۍ ته لاړل.
د يادو سرچينو په وينا، امنيتي ځواکونو د وتلو پرېکړه وروسته له هغه وکړه کله چې د مرغاب اوسېدونکيو اعتراض وکړ.
د مرغاب ولسوالۍ اوسېدونکيو څو ورځې وړاندې د ناامنيو د ډېرېدو له کبله اعتراض وکړ او له امنيتي ځواکونو او طالبانو يې وغوښتل چې ياده ولسوالۍ خوشې کړي. دوی په يوه پرېکړه ليک کې وويل چې د يادې ولسوالۍ امنيت دوی خپله ساتي.
د غور د ولايتي شورا غړی حمیدالله متحد وايي چې طالبانو ته د يادې ولسوالۍ خوشې کولو کې يو امنيتي ارګان لاس لري؛ خو د ارګان د نوم په اړه يې څه ونه ويل.
د نوموړي په وينا، څه موده وړاندې د ياد امنيتي ارګان استازی سمک سيمې ته تللی او د سيمې اوسېدونکي يې د امنيتي ځواکونو پر ضد راپورته کړل ترڅو امنيتي ځواکونه له يادې ولسوالۍ ووځي.
د غور د امنيې قومندانۍ وياند عبدالمعروف رامش دا ادعا ردوي او وايي چې ټول امنيتي ځواکونه مرغاب ولسوالۍ کې حضور لري.
د يادولو ده چې شاوخوا يوه مياشت وړاندې مرغاب ولسوالۍ طالبانو نيولې وه.
