د افغانستان د کورنیو او ملي دفاع وزارتونو چارواکي وايي، چې د کورنیو تولیداتو د ودې په موخه یې په روان کال کې سلګونه تدارکاتي قراردادونه یې خصوصي سکتور ته ورکړي دي.
د کورنیو چارو وزارت د تدارکاتو رییس نوید احمد بخشي نن (سه شنبې) د کورنیو تولیداتو د ملاتړ په غونډه کې وویل، چې دغه وزارت سږ کال د ۱۵،۵ میلیارده افغانیو په ارزښت ۶۵۹ تدارکاتي قراردادونه له کورنیو شرکتونو سره لاسلیک کړي دي.
همدا راز د ملي دفاع وزارت د تدارکاتو ریاست مرستیال جنرال غلام سخي غوڼده کې وویل، د دغه وزارت د تدارکاتو زیاته برخه توکي د کورنیو تولیداتو څخه اخیستل کېږي.
دی وايي، د ملي دفاع وزارت په ۲۰۱۵ زکال کې د ۶۷ میلیاردو افغانیو په ارزښت ۵۰۴ قراردادونه د کورنیو تولیداتو له شرکتونو سره لاسلیک کړي دي.
د نوموړي پر خبره، په راتلونکي کال کې به د کورنیو شرکتونو سره د ۷۷ میلیارده افغانیو په ارزښت قراردادونه لاسلیک کړي.
د افغانستان د صنعت کارانو د ټولنې مرستیال نصیر احمد انصاف وايي، چې له خصوصي سکتور څخه د حکومت ملاتړ د پانګونې او د خلکو له پاره د کار موندنې زمېنه برابروي.
ده وویل، چې د کورنیو تولیداتو څخه د حکومت ملاتړ د دې لامل کېږي چې دغه کار په یو دود بدل شي.
په ورته وخت کې د اقتصاد وزیر عبدالستار مراد وویل، چې د کورنیو تولیداتو د ودې یواځېنۍ لاره له دغو تولیداتو ملاتړ او لګښت کول دي.
نوموړي له ټولو د کورنیو چارو، ملي د فاع او نورو حکومتي بنسټونو وغوښتل، چې کورنیو تولیداتو ته دې مخه کړي.
د کورنیو او ملي دفاع وزارتونه هر کال د تدارکاتو په برخه کې زیات شمېر قراردادونه لري، چې د قانون پر بنسټ د افغان حکومت ادارې د کورنیو تولیداتو سرچینو ته په خپلو قراردادونو کې په لومړيتوب کې ځای ورکړي.
