د ملي امنیت شورا وايي، د طالبانو یو تخنیکي پلاوی د بندیانو پر تبادلې د ګډ کار لپاره کابل ته راغلی دی.
د ملي امنیت شورا په یوه خبرپاڼه کې لیکلي چې د طالبانو یو تخنیکي پلاوی په کابل کې دی او د دواړو خواوو د بندیانو د تبادلې پروسې پر څرنګوالي د بحث لپاره د افغان حکومت له پلاوي سره ګډ کار کوي.
کابل ته د طالب پلاوي اوسنی سفر داسې مهال دی چې افغان حکومت په تېرو ورځو کې شاوخوا زر طالب بندیان خوشې کړي دي.
طالبانو د افغان حکومت د دغه ګام هرکلی کړی او ویلي یې دي چې دوی به هم ورته ګام پورته کړي.
په قطر کې د طالبانو د سیاسي دفتر ویاند سهیل شاهین هم په یوه ټویټ کې لیکلي چې یو پنځه کسیز پلاوی یې کابل ته لېږلی دی.
د یادونې ده چې د طالبانو یو ۵ کسیز پلاوی د وري میاشتې په دولسمه کابل ته راغلی و، خو له څو پرلهپسې مخامخ ناستو وروسته یې کابل پرېښود.
افغان حکومت د طالبانو او امریکا له هوکړې وروسته تر دوو زرو زیات طالب بندیان خوشې کړي او په مقابل کې یې طالبانو هم تر ۲۶۱ پورې د حکومت بندیان خوشې کړي دي.
ټاکل شوې د افغان حکومت او طالبانو ترمنځ د بندیانو له تبادلې وروسته د سولې مخامخ خبرې اترې هم پیل شي.
