د بلخ ولایت د پوهنې ریاست مسوولین د دوی په رسمي چارو کې د ولایتي شورا غړو له لاسوهنې شکایت کوي او د ولایتي شورا پر غړو تور لګوي، چې د ښوونکو او خپلوانو په ګومارلو کې مداخله او له خپل نفوس څخه استفاده کوي.
دغه ریاست وايي، د بلخ ولایتي شورا د فشارونو له امله د پوهنې کارونه له خنډ او ځند سره مخ شوي دي.
د بلخ د پوهنې رییس مولوی عبدالعزیز عزیز وايي، هغه کاندیدان چې د پوهنې ریاست سره په ازموینه کې ناکامېږي، د ولایتي شورا وکیلانو په واسطه د پوهنې په نظام کې شاملېږي.
عزیز وویل، څو ځلې دا سې شوي چې د یو ښوونکي د ګومارلو په برخه کې د ولایتي شوار غړي په ډله ییزو ډول د پوهنې ریاست ته مراجعه ورکوي.
دی وايي، داسې هم شوي، چې څو کسان په ازموینه کې بریالي شوي وي، خو د جذب د کموالي له امله د ولایت او وزارت مقام له خوا امر لرونکو کسانو ته لومړیتوب ورکول شوی.
په ورته وخت کې د بلخ ولایتي شورا رییس محمد افضل حدید وايي، چې د پوهنې ریاست کمزوری مدیریت او کار کړنه د پوهنې ریاست د کړکېچ لامل شوې.
حدید د پوهنې ریاست په چارو کې د ملي شورا او ولایتي شورا د ځینو وکیلانو لاسوهنه مني، خو وايي، د پوهنې په ریاست کې موجود بحران وکیلان لاسوهنې ته اړ کړي دي.
د ولایتي شورا رییس د پوهنې ریاست په شته ګډوډیو کې د دې ریاست مرستیالان او د انساني سرچینو مدیر ګرم بولي.
محمد افضل حدید وايي، سره له دې چې د پوهنې رییس پاک شخص دی، خو د ریاست د چارو په مدیریت کې پاتې راغلی دی.
د بلخ د پوهنې په ریاست کې موجود کړکېچ هغه مهال رامنځته شو، چې دغه ریاست د ځوانو ښوونکو د ګومارلو له پاره له شاوخوا ۲زرو کسانو د ازادې سیالۍ له لارې ازموینه واخیستله؛ په داسې حال کې چې د پوهنې ریاست د جذب ظرفیت د کاندید شویو کسانو په پرتله ډېر کم وو.
