.jpg)
د ټول هېواد په کچه د برېښنايي پېژندپاڼو د پېلېدلو بهیر د ولسي جرګې نننۍ غونډې کې د استازیو ترمنځ شخړې رامنځته کړې.
د ولسي جرګې دوه غړي راحله سلیم او لطیف پدرام وايي، ولسمشر محمداشرف غني د دې بهیر په پیلولو سره هڅه کوي د افغانستان په نورو قومونو جعلي هویت ومني.
د دوی په اند، د ولسمشر دغه ګام د افغانستان اساسي قانون خلاف کار دی.
دوی باوري دي چې د ولسمشر غني دا کار به د قومونو ترمنځ تقابل رامنځته کړي.
خو د ولسي جرګې ځېنې نور غړي بیا د برېښنايي پېژندپاڼو ترلاسه کول د افغانستان د هر وګړي حق ګڼي او وايي، کوم شخص یا کومه ډله باید د دې کار مخه ونه نیسي.
د ولسي جرګې غړی منورشاه بهادري وايي، هېواد کې د ملي یوالي حکومت لهپاره بدیل نهشته او افغانان باید له دغه حکومت نه ملاتړ وکړي.
د برېښنايي تذکرو وېشلو بهیر د تېرې پنجشنبې په ورځ په رسمي ډول د ولسمشر محمداشرف غني له لوري پیل شو؛ خو اجرایوي رییس عبدالله عبدالله په هماغه ورځ د پېژڼدپاڼو وېشلو بهیر بېمشروعیته کار او دغه پروسه یې ناکامه وبلله.
