.jpg)
بدخشان کې په دې وروستیو کلونو کې د مچیو روزلو مینهوال زیات شوي دي او دغه ولایت کې د مچیو روزلو زیات شمېر فارمونه جوړ شوي دي، خو د دې محصول لهپاره د بازار نهشتوالی یو له مهمو ستونزو دي چې مچۍ روزونکي ورسره مخ دي.
د دغه ولایت په مرکز فیضاباد ښار کې د مچۍ روزلو د یو فارم مسول مبارز وايي، د دوی د شاتو محصول په کال کې ۳۰۰ منو ته رسېږي خو د دغه تولید د پلور بازار نهشتوالي له کبله د دوی په اقتصادي وضعیت کې هېڅ ډول بدلون نه دی راغلی.
په خبره یې د مچۍ روزلو د اړتیاوړ موادو نشتون او د دولت نه ملاتړ لامل شوی هغوی د مچیو روزلو زیاتره مواد او تجهیزات له پاکستان نه راوړي.
.jpg)
د بدخشان مچۍ روزونکي وايي، د بدخشان بازارونو ته د بېکیفیته شاتو واردول لامل شوي چې د هغوی د محصولاتو بازار کمرنګه شي او له دغو محصولاتو سره د سیالۍ توان نهلري.
خو د بدخشان د کرنې رییس محمدعالم عالمي وايي، سیمهییز حکومت په پام کې لري ترڅو مچۍ روزونکیو ته د بستهبندۍ لارې چارې ور وښيي، د نښان په نصب سره د بدخشان د شاتو هویت مشخص کړي، د بازار موندنې او د پېرېدونکیو ډاډ ترلاسه کولو لهپاره زمینه برابره کړي.
د دغه ولایت د کرنې ادارې مسوولان وايي، هغوی د بېلابېلو نندارتونونو په جوړلو سره هڅه کوي د مچۍ روزونکیو محصولاتو لهپاره بازار موندنه وکړي او د بدخشان د شاتو بازارموندنې لهپاره نور پروګرامونه هم ترلاسه لاندې ونیسي.
