قطر کې د سولې یوولسم پړاو خبرو پر مهال د عراق بغداد کې د امریکا له لوري د ایران د اسلامي انقلاب د سپاهپاسدارانو د قدس ځواک قومندان د قاسم سلیماني وژل کېدل، د افغانانو اندېښنې راپورته کړې دي.
که څه هم دغو خبرو تر دامهاله د پام وړ پایله نه ده درلوده، خو بیا هم خلک تر بل هر وخت زیات د امریکا او ایران ترمنځ د اړیکو ترینګلي کېدو په اړه اندېښنه ښيي.
د نړیوالو چارو کارپوهان هم د خلکو د اندېښنو په تايير سره وايي، افغان حکومت باید اوسنیو شرایطو کې په ډیپلوماټیک درایت سره خپله بېطرفي وساتي.
محب الله شریف سلاموطندار ته وايي، که څه هم د ایران د سپاهپاسدارانو د قدس ځواک د قومندان وژل کېدل به د سیمې هېوادونو پر وضعیت، اقتصاد او افغانستان کې د سولې پر خبرو اغېزې وکړي، خو ډېره د اندېښنې وړ خبره نه ده.
نوموړی د فاطمیون لښکر ته په اشارې وايي، د افغانستان له خاورې د امریکا پر وړاندې هر ډول ابزاري، استخباراتي او غچاخیستونکی کار ناممکنه ښکاري.
د نړیوالو چارو بل کارپوه عثمان کامران وايي، ایران تل له طالبانو په ملاتړ تورن دی او د سپاهپاسدارانو د قدس ځواک د قومندان پر وژل کېدو سره، د افغانانو ترمنځ د افغانستان د سولې خبرو د سبوتاژ کېدو په اړه اندېښنې ډېرې شوې دي.
خو د طالبانو حکومت کې د عدلیې پخوانی وزیر سید اکبر اغا سلاموطندار ته وايي، د ایران د سپاهپاسدارانو د قدس ځواک د قومندان قاسم سلیماني وژل کېدل به د افغانستان پر سولې او امنیت دومره منفي اغېزې ونهلري.
د نوموړي په وينا، دا امکان نه لري چې ایران دې د افغانستان په خاوره کې له امریکا د غج اخیستو په هڅه کې واوسي.
د ایران د سپاهپاسدارانو د قدس ځواک قومندان قاسم سلیماني چې د امریکا په نوملړ کې وو، د جمعې په سهار د عراق پلازمېنې بغداد کې د امریکايي پوځ په برید کې ووژل شو.
د امریکا ولسمشر ډونالډ ټرمپ قاسم سلیماني د افغانستان په ګډون بېلا بېلو هېوادونو کې د زرګونو امریکايي ځواکونو قاتل بللی او ویلي يې دي چې، سلیماني له مالي، لوژستیکي او تسلیحاتي اړخه له طالبانو ملاتړ کاوه.
اړوند مطالب:
