که څه هم د تاوتریخوالي کمولو یا اورکم اوونۍ له پیل راهیسې افغان وګړيو یوه ورځ هم د طالبانو له خوا له تاوتریخوالي، نښتو او برمته نیونو پرته نه ده تېره کړې، خو بیا هم ډېری ولایتونه له نسبي ارامۍ سره مخ وو او د تاوتریخوالي کچه په کې کمه وه.
د اورکم اوونۍ څلورمه ورځ د زابل ولایت د ارغنداب ولسوالۍ په انځورګي سیمه کې د سړک غاړې ماین چاودنې سره پيل شوه. د زابل ولایت د والي ویاند ګل اسلام سیال سلام وطندار ته وايي، دغه پېښه نن سهار ۹ بجې شوې او په پایله کې یې د ملي اردو ۴ سرتېري ژوبل شوي دي.
سیال زیاتوي چې دغه ماین د طالبانو له لوري خښ کړل شوی و.
د سلام وطندار محلي او ولایتي سرچینې وايي، له زابل پرته په نورو ولایتونو کې د طالبانو له خوا جنګي پېښې او چاودنې نه دي ثبت شوي.
دا په داسې حال کې ده چې د اورکم درېیمه ورځ په بلخ، سمنګانو، غزني، هلمند، کندهار، روزګان، فراه، غور او میدان وردکو ولایتونو کې له نښتو، چاودنو او برمته نیونو سره مل وه.
د دغو پېښو له ډلې تر ټولو تازه یې د غزني ولایت په قره باغ ولسوالۍ کې له امنیتي ځواکونو سره د طالبانو مخامخ جګړه ده چې په کې ۴ پولیس سرتېري او ۲ طالبان ژوبل شوي او یو طالب وژل شوی دی.
په غزني د پوځ د درېیمې لوا ویاند علي شکاري وايي، نښته د غزني – کندهار پر لویه لار شوې ده.
د غزني ترڅنګ، طالبانو په غور ولایت کې هم په یو لړ فعالیتونو لاس پورې کړ او د چهارسدې ولسوالۍ له غازيانو کلي یې ۸ ملکي وګړ وتښتول.
د چهار سدې ولسوالۍ امنیې قوماندان حبیب الله راجعي سلام وطندار ته وايي چې دغه کسان له دولت سره د همکارۍ په تور برمته شوي او د طالبانو تر کنټرول لاندې سیمو ته وړل شوي دي.
د سيمهييزو سرچینو په حواله، طالبانو د اورکم په درېیمه ورځ د بلخ په چهارکنت ولسوالۍ کې هم د ولسي پاڅونوالو څلور سرتېري او د یوې ښځې په ګډون درې ملکي وګړي په ډزو وژلي دي.
دغه راز طالبانو په فراه، هلمند، میدان وردکو، کندهار او سمنګانو کې هم د امنیتي ځواکونو پر کاروانونو ډزې کړي، د سړک غاړې ماینونه یې الوځولي او ځینې کسان یې له ځانه سره وړي دي.
د کورنیو چارو وزارت ویاند نصرت رحیمي سلام وطندار ته وايي چې طالبانو له تېرې ورځې راهیسې په فراه، غزني او زابل ولایتونو کې بریدونه کړي چې په پایله کې یې ۵ سرتېري وژل شوي او ۱۰ نور ژوبل شوي دي.
طالبانو هم په زابل او فراه ولایتونو کې د سړک غاړې پر ماینونو د دولتي ځواکونو ختل مني او وايي چې په دغو چاودنو کې یې ۴ سرتېري وژلي او ۵ نور یې ژوبل کړي دي.
دا په داسې حال کې ده چې د هېواد په نورو ولایتونو کې امنیتي وضعیت د پام وړ ښه شوی او خلک ارام ژوند تېروي.
په دې تړاو:
