د ملګرو ملتونو سازمان سرمنشي انتونیو ګوتریش د افغانستان سیاسي او امنیتي وضعیت په اړه خپل درې میاشتنی راپور د دې سازمان امنیتشورا ته وړاندې کړ.
په یاد راپور کې امنیتي اندېښنې، د افغان سولې پروسه او سیمهییزې همکارۍ، د بشري حقونو وضعیت، د کډوالو بېرته راستنېدل او د ټاکنو پروسه څېړل شوې ده.
د ملګرو ملتونو سازمان سرمنشي پهدې راپور کې ویلي، له یوشمېر لاسته راوړنو سره سره، د افغان سولې او امنیت موضوع اوس هم پېچلې او د اندېښن وړ ده. ښاغلي ګوتریش پهدې برخه کې له وسلهوالو طالبانو سره د ملي یووالي حکومت ۳ ورځني اوربند او د داعش ډلې فعالیتونو ته هم اشاره کړې ده.
انتونیو ګوتریش په ۲۰۱۸م کال کې د ملکیانو مرګژوبلې په اړه داسې لیکي: «یوناما د جولای په پنځلسمه د وسلهوالو نښتو پرمهال د ملکیانو ساتنې په اړه ۶ میاشتنی راپور کړ. یوناما د ۲۰۱۸ کال د جنوري له لومړۍ د جون تر ۳۰مې د ۵۱۲۲ کسانو مرګژوبله ثبت کړې چې ۱۶۹۲ یې وژل شوي او ۳۴۳۰ نور یې ټپیان دي.»
دغه راز د دې راپور په یوه برخه کې لیکل شوي، که څه هم وسلهوالې نښتې په افغانستان کې د امنیتي پېښو ۶۱ سلنه جوړوي، خو بیا هم سږکال د تېر هغه په پرتله ۱۴سلنه کمې شوي دي.
ګوتریش د ټاکنو برخه کې د سیاسي ګوندونو اعتراضونو ته اشاره کړې او د یادې پروسې په روڼتیا یې د هغوی د ټینګار یادونه هم کړې ده.
د دې ترڅنګ نوموړي ویلي چې د افغانستان ټاکنو بهیر ملاتړو هېوادونو ژمنه کړې چې له یادې پروسې سره به ۵۷ میلیونه ډالره اضافي مرسته کوي.
