د افغانستان مرکزي بانک چارواکي وايي، کوم زیانونه چې اوس د افغانیو او نورو اسعارو پر وړاندې راپيدا شوي؛ دا د افغانستان د مرکزي بانک پیسو پورې اړه نه لري.
د افغانستان د مرکزي بانک رییس خلیل صدیق نن (یکشنبې) په کابل کې یوې خبرې غونډې ته وویل، چې په نړیواله کچه د ډالرو قیمت لوړ شوی دی.
د صدیق پر وینا، ډالر په تېرو ۲ کلنو کې ډېر لوړ تللی او علت یې هم په امریکا کې د کاري موکو پیدا کېدل دي، په خبره یې پخوا په امریکا کې ۷ سلنه وګړي بېکاره وو، خو اوس ۵ سلنه وګړي بېکاره دي، چې دا مستقیماً په نورو اسعارو اغېز لرلی شي.
ده د بېلګې په توګه د څو اسعارو د پرېوتلو کېدلو نومونه واخیستل او ویې ویل، چې په نړیوال بازار کې یې د ډالرو پر وړاندې ارزښت راټیټ شوی دی.
صدیق همداراز زیاته کړه، چې افغانۍ ۲۱ سلنه، اسټرلېنګ پاونډ ۷،۳ سلنه، ترکي لېره ۲۱ سلنه، ترکمنستانی منات ۲۲،۵ سلنه او د تاجکستان سوماني ۴۵ سلنه د ډالرو په مقابل کې خپل اعتبار له لاسه ورکړی دی.
ده په ټینګار سره وویل، چې د افغانستان اوسني اقتصادي حالت ته په کتو سره ویلی شو، چې افغانۍ اوس هم د منات، سوماني او نورو اسعارو په پرتله په ښه موقف کې ده، خو نن په کابل ښار کې یو ډالر د ۶۹ افغانیو او ۲۰ پولو په مقابل کې تبادله کېدلو.
د افغانستان مرکزي بانک مشر وايي، دوی د افغانۍ د ثبات له پاره د روان کال له جدي میاشتې نه تراوسه پورې ۳ سوه میلیونه ډالر بازار ته عرضه کړې دي او په پام کې لري، چې د حوت میاشتې تر پایه پورې د افغانیو د ثبات له پاره له ۲۰۰ تر ۳۰۰ میلیونو ډالرو پورې بازار ته عرضه کړي.
صدیق په ورته وخت کې په اقتصادي اوضاع کې د بدلون له پاره د سولې خبرې اترې یو ښه فال ګڼي او وايي، که سږ کال د سولې خبرې بریالۍ شي او اوسنی اقتصادي پلانونه عملي شي؛ شونې ده، چې په راتلونکي کال کې د بهرنیو اسعارو پر وړاندې د افغانۍ اوسنی وضعیت د اوس پر پرتله ښه شي.
د افغانستان بانک چارواکي وایي، د افغانۍ د ارزښت کمېدل به، په هېواد کې د مالي بحران رامنځته ته نه کړي، ځکه چې افغانۍ پیاوړې مالي بنسټ لري.
سره له دې چې د ملي یووالي د حکومت له جوړېدو وروسته؛ بیکارۍ او اقتصادي ستونزو د خلکو اندېښنې راوپارولې؛ خوافغانستان بانک وايي، اوسنی مالي وضعیت د موادو پر بیو ناوړه اغېز نه دی کړی.
د کارپوهانو په نظر، په ښه توګه د عوایدو راټولول، پراختیايي پروژې پلی کول، تولیداتو او محصولاتو ته عملي پروګرامونه تنظیمول او داسې نور اقدامات هغه څه دي، چې د هېواد اقتصاد ي وده ګړندۍ کولی شي.
