ناپېژاندو وسله والو د کندهار ولایت په شاه ولي کوت ولسوالۍ کې د یوې کورنۍ اووه غړي وژلي دي؛ په وژل شویو کسانو کې درې مېرمنې او څلور یې نارینه دي.
پېښه تېره شپه د شاه ولي کوټ ولسوالۍ د ملي کارېز په سیمه کې را منځته شوې ده.
د کندهار ولایت د امنیې قوماندانۍ ویاند ضیا دراني سلام وطندار سره په مرکه کې وویل، چې وژل شوي وګړي ولسي خلک دي او ټول د یوې کورنۍ غړي دي.
درانی وايي، د پېښې علت او انګېزه معلومه نه ده او پولیسو خپلې پلټنې پیل کړي دي.
نوموړي وویل، چې د دوی د معلوماتو له مخې د کورنۍ د غړیو په برید کې یو وسله وال هم وژل شوی، چې د وژل شوي کس جسد وسله والو له ځانه سره وړی دی.
ضیا دراني دا هم وویل، چې ښايي، "وسله والو کسانو له دې کورنۍ غوښتنې کړي وي، او د نه منلو په صورت کې وسله والو دغه ظلم او قتل کړی وي."
د سیمې یو اوسېدونکي محمد اکبر له سلام وطندار سره د ټیلیفون په کرښه وویل، چې وژل کسان یې کلیوال دي او عادي خلک وو.
محمد اکبر وايي، "د شپې یې په کلي کې د ډزو غږونه واورېدل، ګهیځ شوي د کلي په جومات کې خلکو وویل، چې ناپېژاندو وسله والو بېګاه په کلي کې د یوې کورنۍ اوتنه په کور د ننه وژلي دي."
د کندهار ولایت د بشر حقونو سیمه ییز دفتر پېښه غندي او وايي، چې د جګړې ښکېلې خواوې دې د ولسي خلکو ژوند ته پام وکړي.
تر اوسه پورې هېڅ وسله والې ډلې د دې پېښې مسوولیت نه دی اخیستی.
