د ولسمشر محمد اشرف غني او اجراییه رییس ډاکټر عبدالله عبدالله مرستیالانو د یک شنبې په ورځ (دسلواغې پر۱۲مه) کابل کې په یوه خوله په ټاکنیز نظام کې پر اصلاحاتو ټینګار وکړ.
دا ژمنه داسې مهال تکراريږي، چې له تېرې یوې اونۍ راهيسي د ټاکنیزو نهادونو، مدني ټولنو له خوا پر حکومت تور پورې کيږي، چې ټاکنیزو اصلاحاتو ته ژمن نه دي.
خو د یک شنبې په ورځ په کابل کې جوړ شوي د ټاکنیزو اصلاحاتو ترنامه لاندې ملی کنفرانس ته د ولسمشر دویم مرستیال سروردانش وویل: په ټا کنو کې ترټولو مهمه د ټاکنو د ترسره کیدو څرنګوالۍ او مدیریت دی.
ښاغلی دانش وایې، اوس د ټاکنیز نظام سمون ته زمینه برابره شوې، چې په اړه یې باید د مدني ټولنې استازي خپل وړاندیزونه چمتو او د دولت مشرتابه ته وسپاري.
په همدې حال کې د اجرایوي رییس دویم مرستیال محمد محقق وویل: د تېرو ټاکنو ترسره کولو له پاره پیاوړې سیاسي اراده نه وه، په داسې حال کې چې پر دغه بهیر د خلکو باور زیاتېدو له پاره پياوړې سیاسي اراده په کار ده.
له ۱۵۰ زیات او کم مدني ټولنو څخه دجوړبنسټ(اکسین) مشر جانداد سپین په دغه کانفرانس کې په ټاکنیزو بنسټونو، د ټاکنو قانون، د ټاکنیزو کمېسیونو دندو، واکونو او جوړښت قانون دې سمون او صلاح راوستل ضروري وبلل.
ښاغلي سپين غر وړاندیز وکړ چې ددې اصلاحاتو له پاره دې یو واک لرونکی ۷ کسیز کمېسيون جوړ شي، چې دمدني بنسټونو استازي په کې هم غړیتوب ولري.
دسپین غر د وړاندیز پر اساس دغه کمېسيون دې دا واک هم ولري، چې په مالي او تخنیکي برخه کې له ملي او نړیوالو بنسټونو سره تړونونه لاسلیک کړي.
د ولسي جرګې د نړيوالو اړیکو کمېسيون مشر عبدالقادر ځاځي په د سلواغې د ۱۲مې دغه ناسته کې وويل، چې اوس مهال د ټاکنيزو کمېسيونونو د دندو، واکونو او جوړښټ قانون د تعديل طرحه د جرګې په عدلي او قضايي کمېسيون کې تر بحث لاندې ده.
په همدې حال کې د ټاکنیزو شکایتونو اورېدو خپلواک کمېسيون مشر عبدالستار سعادت پر خپله فیس بوک پاڼه لیکلی و، چې دولسي جرګې دورستي تقنیني کال له امله اوسنۍ ولسي جرګه نه شي کولی د ټاکنو اړوند قوانينو کې اصلاحات یا تعدیلات راولي.
ولسمشر اشرف غني او اجرايوي ريیس د تاکنیز کړکیچ وروسته په سیاسي هوکړه کې ژمنه کړې وه چې په ګډه به ټاکنیزو اصلاحاتو برخه کې ګامونه اخلي.
