روغتیا وزارت دا شمېره په داسې حال کې اعلانوي، چې د میندو د مړینې دغه کچه په تېرو ۱۵ کلونو کې د زېږون پرمهال د اندېښنې وړ وه.
د دغه وزارت مسولانو د قابله ګانو د ورځې د نمانځنې په ورځ په یوه غونډه کې وویل، چې د میندو د مړینې کچه ۳ تر ۴ برابره راکمه شوې ده او اوس دغه وزارت کولی شي، چې د میندو د مړینې۶۰ سلنه خطر راکم کړي.
د دغه وزارت مسولانو تېره ورځ (دوشنبې د می په ۱۸مه) د قابلو د ورځې د نمانځنې په پار د "قابله ګانې د ښې راتلونکې لپاره" تر نامه لاندې یوه غونډه کې وویل، چې افغانستان ته د میندو د مړینې په مقابله کې اوږده لاره پرته ده.
د روغتیا وزارت مرستیاله ناجیه طارق وايي، د دوی معلومات ښيي، چې په هېواد کې د قابله ګانو له زیاتوالي او پرمختګ سره، د ښځو او نویو زېږدلو ماشومانو په روغتیا کې ښه والی راغلی دی.
د اغلې ناجیې طارق په وینا په ۲۰۱۲ میلادي کال کې د ۴۰ سلنو ښځو د ماشومانو زېږېدلو کارونه د قابله ګانو له خوا شوي، چې دغه کچه د ۲۰۰۵ او ۲۰۰۷ میلادي کلونو په پرتله زیاتوالی ښيي.
په ورته وخت کې د ښځو چارو وزارت مرستیاله مژګان مصطفوي وویل، چې د دوی وزارت د روغتیا وزارت ته داسې طرحه ورکړې ده، چې له مخې به یې تر ۲۰۱۵ کاله پورې د میندو په مړینه کې د پام وړ کموالی راشي.
د مژګان مصطفوي په خبره، د ورکړل شوې طرحې له مخې په پام کې وه، چې د ۲۰۱۵ زېږديز کال تر پایه به په هرو سلو زرو میندو کې د مړینې کچه ۱۶۰۰ ته راټیټه کړي، خو دغه کچه اوس ۴۰۰ ته راټیټه شوې ده. دا د دې مانا ورکوي، چې روغتیا وزارت په خپلو کارونو کې د تېر کال په پرتله د توقع خلاف ښې لاسته راوړنې لري.
په همدې حال کې د ښځو او ځوانانو په چارو کې د اجرایه ریس مشاورې حبیبې سرابي د قابله ګانو د زحمتونو په اړه وویل، چې قابله ګانې په ډېرو سختو حالاتو کې د میندو او نویو زېږدونکیو ماشومانو ژوند ژغوري.
د حبیبې سرابي په خبره، اجرایه ریاست د دغو وزارتونو له پروګرامونو په تطبیق کې مرسته کوي.
څېړنې ښيي، چې هر کال له ۲۰۰ زرو زیاتې میندې او ۳ میلیونه نوزېږي کوچنیان د زېږون پر مهال خپل ژوند له لاسه ورکوي.
