د افغانستان پخوانیو جهادي مشرانو او د تېر حکومت چارواکو د افغانستان حراست او ثبات په نوم شورا اعلان کړه.
جهادي رهبر عبدالرب رسول سیاف د دې شورا د اعلان په پيل کې وویل، چې د دوی موخه د اوسني نظام د ګډوډۍ مخنیوی، د هېواد او نظام بقا او د دیني ارزښتونو د ساتنې له پاره د افغانستان یو موټي ساتل دي.
دغه شورا نن (جمعه، د ډېسمبر په ۱۸مه نېټه) اعلان شوه.
استاد سیاف په خپلو خبرو کې وویل، چې د افغانستان د حراست او ثبات شورا راټول شوي کسان د ولسونو اندېښنې ښيې وړاندې کولی شي او په همدې دلیل د ناامنیو، غربت، وزګارتیا او د نظامه دفاع کول د خپل کارو لومړیتوب ګڼي.
عبدالرب رسول سیاف د سولې خبرو ته په اشارې سره وویل، چې د افغانستان جګړه د کفر سره جنګ نه دی او د دې نښتې د پای ته رسولو او سولې راوستلو په برخه کې د حکومت ملاتړ وکړو.
همدا ډول په دغې شورا کې د پخواني ولسمشر لومړي مرستیال محمد یونس قانوني وویل، چې دغه شورا به د حکومت په خلاف نه وي او د حکومت ټیکاو له پاره به هڅې کوي.
په دغې ناستې کې جهادي مشرانو د ملي یووالي حکومت څخه غوښتنه کوله، چې دوی دې په خپلو لومړنیو ژمنو عمل وکړي.
دوی ټینګار کاوه، چې اوسنی حکومت دې د ټاکنیز نظام سمون او لویې جرګې را بللو په برخه کې هر څه ژر لاس په کار شي او د خلکو اندېښنو ته دې د پای ټکی کېږدي.
د افغانستان د حراست او ثبات شورا غړي پخواني جهادي مشر عبد الرب الرسول سیاف، د کرزي د واکمنۍ وروستیو کې د هغه لومړی مرستیال محمد یونس قانوني، د کورنیو چارو پخوانی وزیر عمر داودزی، د اقتصاد پخوانی وزیر عبدالهادي ارغندیوال، د ولسي جرګې مشر عبدالروف ابراهیمي، دفاع پخوانی وزیر بسم الله محمدي، د انرژۍ او اوبو پخوانی وزیر محمد اسمعیل خان، او ځېنې نور کسان دي.
یاده شورا وايي، د راتلونکو څلورو کلونو له پاره به پروګرامونه جوړ کړي، چې د ولسوالیو او ولایتي شوراګانو په ټاکنو کې به یې استازي ګډون وکړي.
د افغانستان د حراست او ثبات شورا وویل، چې دوی به په راتلونکو ولسمشریزو ټاکنو کې خپل استازی ولري.
