د شل اوریزه کرکټ نړېوال جام په ټاکنیز پړاو لوبه کې د افغانستان او کینیا ترمنځ لوبه، خو لرې ان پچه هم وا نه چول شوه.
د افغانستان کرکټ بورډ د خبرپاڼې له مخې، لوبه د پرلپسې باران له کبله د لوبڅارانو له خوا په مساوي توګه پای ته ورسېده او دواړو لوبډلو ته یو یو امتیاز ورکړل شو.
د کرکټ نړېوالی شورا د معلوماتو له مخې افغانستان اوسمهال په خپل (اي) ګروپ کې د ۴ لوبو وروسته په ۷ امتیازونو سره لومړی او کینیا بیا د همدومره لوبو وروسته ۵ امتیازونو سره په دویمه لیکه کې پاتې شوه.
ټاکل شوې ده، چې افغانستان به سبا ماسپښین یوه نیمه بجه له عمانۍ کرکټ ملي لوبډلې سره د روان ټاکنیز پړاو پنځمه لوبه ترسره کړي.
که افغانستان په روانو سیالیو کې خپل لومړی مقام په ګروپ کې د لوبو ترپایه وساتي، نو نیغ په نیغه به په راتلونکي ۲۰ اوریزه کرکټ نړېوال جام سیالیو کې ولوبېږي.
افغانستان تراوسه د ایرلینډ او سکاټلینډ په کوربتوب په روان ۲۰ اوریزه کرکټ نړیوال جام ټاکنیزپړاو کې ۴ لوبې ترسره کړي دي، چې هالینډ، عربي امارات او سکاټلینډ لوبډلو ته یې سترې ماتې ورکړي دي.
په روان کرکټ نړېوال جام ټاکنیز پړاو کې ټولټال د نړۍ ۱۴ مخکې کرکټ لوبډلې برخه لري، چې ۶ لوبډلې به ترې د راتلونکې ۲۰۱۶ م ز کال ۲۰ اوریزه کرکټ نړېوال جام سیالیو ته غوره شي.
د یادونې وړ ده، چې تراوسه افغانستان په ۳ شل اوریزه کرکټ نړېوال جام سیالیو کې ګډون کړي دي او دا ځل هم څلورم پړاو ۲۰ اوریزه کرکټ نړېوال جام سیالیو ته د رسېدو له پاره د ګډون کوونکو لوبډلو په کتار کې ترټولو پیاوړې او مخکښه لوبډله شمېرل کیږي.
