افغانستان د هنډبال په اسیایي سیالیو کې خپل سیالان مات نه شو کړی

د افغانستان نارینه او ښځینه هنډبال ملي لوبډلو روانه اونۍ د بنګله دېش په کوربتوب اسیایي هنډبال سیالیو کې ګډون کړی وو.

د افغانستان د هنډبال فدراسیون سکرترجنرال جاوید خاور سلام وطندار سره په خبرو کی وویل، افغانستان په دې سیالیو کې یوازې مالدیف ته ماتې ورکړه او پاتې سیالۍ یې خپلو سیالانو ته وبایللې.

د خاور په وینا، د نارینه برخې په سیالیو کې افغانستان لومړۍ لوبه نیپال ته وبایلله، خو په دویمه لوبه کې مالدیف ته ماتې ورکړه او د مخکې تګ چانس یې پیدا کړ.

نوموړي زیاته کړه، افغانستان په وروستۍ لوبه کې د پیاوړې پاکستانۍ لوبډلې خلاف د لوبې ډګر ته ووت، چې ۲۰ د ۴۰ ګولونو په وړاندې ماتې وخوړه او په سیالیو کې د مخکې تګ چانس له لاسه ورکړ.

دغه راز د افغانستان ښځینه هنډبال ملي لوبډلې بیا لومړۍ لوبه ۱۶ د ۱۸ ګولونو په وړاندې د سریلانکا خلاف او دویمه لوبه ۷ د ۳۴ ګولونو په وړاندې کوربه بنګله دېشۍ هنډبال ملي لوبډلې ته وبایلله او په روانو سیالیو کې له مخکې تګ پاتې شوه.

د سویلي او مرکزي اسیا هنډبال ملي لوبډلو ترمنځ د ښځینه او نارینه سیالۍ د یوې اونۍ له پاره د بنګله دېش په کوربتوب ترسره شوې.

په دې سیالیو کې د افغانستان د ۲ لوبډلو په ګډون د ۷ هېوادونو ښځینه او نارینه هنډبال ملي لوبډلو برخه اخیستی وه، چی هندوستان د اتلولۍ څخه دفاع کوي.

د هنډبال فدراسیون سکرترجنرال وايي، د افغانستان هنډبال ملي لوبډله سبا بېرته هېواد ته راستنېږي.