په ارګ کې یوې سرچینې چې نه غواړي نوم یې یاد شي، په ولسمشرۍ ماڼۍ کې پر کورونا د ۴۰ کسانو اخته کېدل تاییدوي.
هغه سلاموطندار ته ویلي چې پر کورونا اخته کسان د ارګ، د چارو ادارې او ملي امنیت شورا کارکوونکي دي.
تر دې مخکې نیویارک ټایمز لیکلي و چې په ولسمشرۍ ماڼۍ کې د ۴۰ کسانو د کورونا د تشخیص پایله مثبته ختلې ده.
نیویارک ټایمز په غونډو کې د ولسمشر د نه موجودیت لامل هم پر کورونا ویروس د ارګ او د چارو ادارې د کارکوونکو اخته کېدل یادوي.
د فرانسې خبري اژانس هم تر دې مخکې د یوه افغان چارواکي له قوله لیکلي و چې ولسمشر ته نږدې ۲۰ کسان پر کورونا ویروس اخته شوي دي.
د ګارډین خبریال هم بېګاه ماښام ولیکل چې افغان ولسمشر د کورونا ویروس معاینه کولو ته نه دی حاضر شوی.
ولسمشرۍ ماڼۍ په دې اړه ځواب را نه کړ. د عامې روغتیا وزارت مسوولان وايي چې نن به په دې اړه په یوه خبري غونډه کې ځواب ووايي.
