د افغانستان د برېښنا ریاست چارواکي وايي، چې د افغانیو پر وړاندې د ډالرو د نرخ لوړوالي له امله د برېښنا بيه ۲۵ سلنه لوړه شوې ده.
د بریښنا شرکت ویاند وحیدالله توحیدي نن یک شنبه (می ۱) په کابل کې خبري غونډې ته وویل، چې د وري میاشتې له پیله د بریښنا یو کیلوواټ بیه ۵۰ پوله چې ۲۵ سلنه کیږي لوړه شوې.
تردې مخکې د یو کیلوواټ بریښنا عادي مصرفونکي باندې په دوو افغانيو ورکول کېده، خو اوس دا بیه (۲ افغانۍ او ۵۰ پولو) ته لوړه شوې ده.
توحیدي زیاته کړه، چې د بریښنا په بیه کې دغه اندازه زیاتوالی ځکه راغلی، چې د افغانیو پر وړاندې د ډالرو بیه لوړه شوې ده.
د توحیدي پر وینا، که د ډالرو بیه نوره لوړه شي ورسره سم د بریښنا بیه لوړیږي او د ډالر په راټيټیدو سره د بریښنابیه هم را ټیټیږي.
نوموړي وویل: " د بریښنا بیه کې ۲۵ سلنه تفاوت رامنځته شوی، چې موږ کولی شو ووایو، په في کیلو واټ بریښنا کې ۵۰ پوله د تيرکال په پرتله زیاتوالی راغلی او د ۱۳۹۵ کال له وري میاشتې د تطبیق وړ ده یانې دا چې پخوا که په دوو میاشتو کې ۲۰۰ افغانۍ ورکول کیدې اوس به ۲۵۰ افغانۍ ورکوي".
د افغانستان بریښنا شرکت چارواکي وايي، چې د بریښنا بیه بیخي لږه لوړه شوې، خو یو شمیر کابل ښاریان بیا وايي، چې بې وزله خلک ددې کمې بيې ورکړې توان هم نه لري.
د کابل ښار دوه اوسیدونکي محمدي ګل حاجي فضل الحق وايي، چې حکومت باید خلکو ته اسانتیاوې رامنځته کړي.
دوی وايي، چې په پخواني نرخ کې د بیلونو د ورکړې توان نه لري، نو د زیاتېدو په صورت کې خو يې هيڅ وسه نه رسيږي.
افغانستان اوسمهال شاوخوا ۹۰ سلنه بریښنا له ګاوندیو هیوادو واردوي، چې د بریښنا شرکت هر کال ۲۲۰ میلیونه امریکايي ډالره د بریښنا صادرونکو هیوادو ته ورکوي.
