د ښځو چارو وزارت «په کاري چاپېریال کې د ښځو په مخ کې د سلو ستونزو تحلیل» په نامه یو راپور خپور کړی دی. په دې راپور کې په کاري چاپېریال کې د ښځو ستونزې او مشکلات څېړل شوي او دا هم په کې راغلي، چې د هېواد ډېر وزارتونو د ښځو له پاره د مصون چاپېریال د برابرولو له پاره حل لارې او تګلارې نه لري. اوسمهال پرته له سیمه ییزو ارګانونو نه بل یو وزارت او اداره هم چې په دې راپور کې شاملې دي، د ښځو د جنسي ځورونې د مخنیوي له پاره ځانګړې طرحه نه لري.
د دې راپور پر بنسټ د کار، ټولنیزو چارو، شهیدانو او معلولینو وزارت ۶۰ سلنه کارکوونکې ښځې، د ښځو چارو وزارت ۴۰ کارکوونکې ښځې او د پوهنې وزرات ۳۰ سلنه کارکوونکې ښځې دي. دا هغه وزارتونه دي، چې د نورو هغو په نسبت په کې د ښځو ونډه ډېره ده. په دې لړلیک کې د کرنې او مالدارۍ وزارت په سلو کې ۴ سلنه ښځینه کارکوونکې او له نشه يي توکیو سره د مبارزې وزارت په سلو کې ۶،۶ سلنه ښځینه کارکوونکې لري، چې د همدې لړلیک په وروستۍ برخه کې راځي.
په ټولیزه توګه په ۵۴ دولتي بنسټونو (۲۶ وزارتونو او ۲۸ ځانګړیو بنسټونو) کې ۲۲ سلنه ښځینه ملکي کارکوونکې تشکیلوي، چې ۹ سلنه هغه یې په رهبرۍ کې قرار لري.
د دې راپور د معلوماتو له مخې، په سلو کې ۲۶ سلنه ښځې چې په افغاني بنسټونو کې په کار بوختې دي؛ د شکایت کولو فرصت نه ورکول کېږي. ۲۳ سلنه د پېژندګلو او واسطو له لارې د استخدام نه، ۱۲ سلنه په کاري او له کاره بېرون چاپېریال کې د جنسي زور ـ زیاتي له امله، ۱۱ سلنه د کمې پوهې نه، ۹ سلنه د لفظي ځورونې له امله او ۴ سلنه ښځې د ښځو او نرانو ګډ کاري چاپېریال نه شکایت کوي.
د جنسي زور ـ زیاتي په برخه کې د ټولپوښتنې ۲۲ سلنه ګډونوالو مثبت ځواب ورکړی، ۴۴ سلنه منفي ځواب او ۳۳ سلنه ګډونوالو هېڅ ځواب نه دی ورکړی. د دوی له ډلې نه ۲۲ سلنه ګډونوالې وايي، چې د جنسي زور ـ زیاتي پر وخت د شکایت نه وروسته له ادارې ویستل شوي او یا ورسره بې انصافي شوې ده.
په دې راپور کې ویل شوي، چې د جنسیت د نه مراعتولو، د دولتي ادارو او بنسټونو په رهبرۍ کې د ښځو کمرنګي، په مدیره پلاوي او معلوماتي چارو کې د ښځو نه شریکول هغه موارد دي، چې په دې راپور کې یې یادونه شوې ده.
د دې راپور د معلوماتو له مخې، په ملکي خدماتو کې د استخدام شرایط، څارنه او د ښځو کمرنګي هغه ستونزې دي، چې په دې راپور کې راغلي دي.
په کاري چاپېریال کې د ښځو په مخ کې د سلو ستونزو تحلیلي راپور لازمې پالیسۍ او مقرارت، فرهنګي ستونزې او د ښځو د بېخ بینايي کارونو په برخه کې د محدودیتونو موجودیت د دې لامل شوي، چې په حکومت کې د ښځو ونډه راکمه کړي.
په دې راپور کې له ۱۷۸ تنو سره مرکې شوې، چې ۱۴۱ تنه یې ښځې دي.
