د اداري فساد له اړخه د کانونو وزارت زیان‌مننې په اړه اندېښنې

له اداري فساد سره د مبارزې او ارزونې ګډې کمیټې نن کابل کې د خبري غونډې پر مهال د اداري فساد له اړخه د کانونو وزارت زیانمننې په اړه راپور خپور کړ.

خبري غونډې ته له اداري فساد سره د مبارزې او ارزونې ګډې کمیټې رییس باري سلام  وویل چې د کانونو سکتور ارزښتي زنځیر په ټولو پړاوونو کې اداري فساد شته.

د ده په وینا، د دوی په راپور کې په نښه شوي چې د دولتي بهیرونو کمزورتیاوو او تشو د کانونو او پترولیم وزارت پر کار هم اغیز کړی او تر څنګ یې ناقانونه کان‌ایستونکي، دغه ناقانونه کان‌ایستونکي خپلس‌ري وسله‌وال کنترولوي او د ادارو چارواکي هم له صلاحیت پرته له کان‌ایستونکیو پیسې اخلي او لاسوهنه کوي.

له داري فساد سره د مبارزې او ارزونې ګډې کمیټې څېړونکی ادریس هاشمي وایي چې د فساد له امله د څارنې بهیر پیاوړتیا هڅې کمزورې دي.

د ده په وینا، د فساد د مخنیوي له‌پاره د کانونو او پټرولیم وزارت کې کره کنټرولي میکانیزمونه نه‌شته.

خو د کانونو او پټرولیم وزارت ویاند عبدالقدیر مطفي وايي چې له اداري فساد سره د مبارزې څارنې او ارزونې ګډې کمېټې راپور نیمګړی او د تېرو کلونو اطلاعاتو پر بنسټ چمتو شوی‌دی.

دا له اداري فساد سره د مبارزې څارنې او ارزونې خپلواکې کمېټې لومړنی راپور دی چې د کانونو او پټرولیم وزارت کې د اداري فساد زیانمننې په اړه خپور شوی‌دی.