په افغانستان کې له ډېرې پخوا زمانې راهیسې د اختري او نوروزي ډالیو وړل دود دي.
خو هغه هېواد چې له پراخې بېوزلۍ او وزګارتیا کړېږي، وګړي یې ډېری وخت د اقتصادي ستونزو له امله د یادو دودونو په پاللو کې پاتې راځي.
یوشمېر ځوانان وایي، ځینې ناوړه دودونه، لکه د نجلۍ کور ته د اختري، روژه ماتي او نوروزي وړل ډېر لګښت غواړي، خو بیا هم خلک اړ دي چې دغه دود وپالي.
بصیر وايي، که څه هم د ټولنې د دودونو پالل ښه کار دی، خو ډېری داسې خلک شته چې د یادو دودونو د پاللو لپاره پیسې په پور اخلي او یاد ټولنیز دودونه پالي.
خو ناهید او حمیرا سره له دې چې د یادو دودونو پر پاللو ټینګار کوي، خو زیاتوي، که د هلک کورنۍ یې وسه ونه لري، د نجلۍ کورنۍ باید پرې فشار را نه وړي.
د دوی په وینا، د ناوړه دودونو پالل نه یوازې لوړ لګښت لري، بلکې د ټولنیزو ستونزو، لکه طلاق او تاوتریخوالي لامل هم ګرځي.
په په همدې حال کې یوه ټولنپوه راضیه دانش وایي، د اقتصادي ستونزو له امله د اختري او نوروزي وړلو دودونه د کورنیو ترمنځ ستونزې راپورته کوي چې په وینا یې، باید د فشار له لارې نه، بلکې په خپله خوښه وپالل شي.
په افغانستان کې د ناوړه دودونو پالل کورنیو ته دروند مالي زیان اړوي او همدا لامل دی چې ځوانان د پور اداینې لپاره خطرناکو کارونو ته لاس اچوي او یا هم کلونه کلونه له بېوزلۍ کړېږي.
