د افغانستان د ملي دفاع وزارت چارواکي وايي، چې له ۲۰۱۷م ز کال وروسته د ملي اردو د ملاتړ له پاره هڅې روانې دي.
د دفاع وزارت سرپرست وزیر محمد معصوم ستانکزي د افغانستان، امريکا او ناټو ترمنځ لومړنۍ ګډ امنيتي هوکړه لیک د کمېسيون په غونډه کې زیاته کړه، چې د دغه هوکړه لیک له لاسلیک وروسته امریکا ژمنه کړې، چې له افغان امنيتي ځواکونو څخه به له ۲۰۱۷م ز کال وروسته هم مالي ملاتړ وکړي.
ستانکزي وویل، اوسمهال د افغانستان دفاع وزارت په دې هڅه کې دی، چې تر ۲۰۲۰ م ز کاله پورې له افغان ملي اردو څخه د نړېوالو مالي ملاتړ جذب کړي.
نوموړي زیاته کړه، چې د امنيتي هوکړه لیک له مخې، د ملي اردو د هوايي ځواک، د تجهیز، مالي ملاتړ او پياوړتیا په برخو کې مقدماتي کارونه ترسره شوي دي.
بل خوا په افغانستان د امريکايي ځواکونو عمومي قومندان جان کمبل په دې غونډه کې وویل، چې د امنيتي هوکړه لیک له لاسلیک وروسته به افغانستان د منظم اردو خاوند شي.
کمبل زیاته کړه، چې بهرني ځواکونه به د دښمن د ګواښونو د له منځه په هدف له افغان امنيتي ځواکونو سره ولاړ وي.
