د افغانستان د ازادو رسنیو د ملاتړ ټولنې (نی) په یوه خبرپاڼه کې د ارمانشهر راډیو او د شهربانو اوونیزې د مسوول مدیر سیدعظیم هاشمي له قوله لیکلي چې د بغلان په مرکز پلخمري ښار کې د سړک غاړې ماین چاودنې دغو دوو رسنیو ته مالي زیانونه اړولي دي.
نی له کورنیو چارو وزارت او ملي امنیت ریاست نه غوښتي چې د رسنیو امنیت ساتلو ته جدي پام وکړي.
نی دغه راز د بغلان له امنیې قومانداني او ملي امنیت ریاست نه هم غوښتي چې یاده پېښه وڅېړي.
د بغلان پولیسو نن سهار وویل چې په پلخمري ښار کې د یوه ماین چاودنې دو محلي رسنیو ته مالي زیان اړولی دی.
د بغلان پولیسو ویلي چې یاده پېښه بېګاه شاوخوا اته بجې شوې ده.
د بغلان پولیسو ویلي چې یاد ماین د دولت وسلهوالو مخالفانو ځای پرځای کړی و.
د ارمانشهر او شهربانو اوونیزې مسوول مدیر عظیم هاشمي سلاموطندار ته ویلي چې په یاده چاودنه کې د دغې راډیو د ودانۍ شیشې ماتې شوې دي.
په بغلان کې د خبریالانو د خوندیتوب کمېټې مسوول فهیم نېکزاد هم د دغه ولایت له ملي امنیت ریاست او امنیې قومانداني نه د یادې پېښې د څېړلو غوښتنه کړې ده.
