د ملي دفاع وزارت ویاند جنرال دولت وزیري سلام وطندار سره د خبرو پرمهال افغانستان کې د نورو امریکايي ځواکونو ځای پرځای کېدل ستایي، خو وايي، امریکا دې د ترهګرۍ له اړخه زیانمنونکي هېوادونه ډېر تجهیز او پر پوځي مرستو تمرکز وکړي.
افغانستان کې د نړیوالو ځواکونو لوی قوماندان تېره پنج شنبې د امریکا د سنا امنیتي کمېټې غونډې ته ویلي، چې افغانستان کې امنیتي وضعیت ترینګلی او د کنټرول له پاره يې دغه هېواد کې د زیاتو امریکايي سرتېرو ځای پرځای کېدو ته اړتیا ده.
د وزیري پر وینا، د ترهګرۍ ضد افغان جګړه کې دې د نړۍ ټول هېوادونه یوموټی شي.
یو شمېر پوځي شنونکي هم باوري دي، چې امریکا دې د نورو پوځیانو لېږلو پرځای افغان ځواکونه تجهیز او له مسلکي اړخه وروزي.
پوځي شنونکی کابل خان تدبیر وايي، د افغانستان جګړه د زیاتو نړیوالو ځواکونو په
ځای پرځای کېدو پای نه مومي؛ بلکې په دې برخه کې د افغان ځواکونو تجهیز ګټور تمامیږي.
بل پوځي شنونکی عتیق الله امرخېل هم باوري دی، چې افغانستان ډېرو تجهیزاتو او هوايي ځواک ته اړتیا لري.
امرخېل وايي، چې د نیو امریکايي ځواکونو راتګ پر ځای دې افغان امنیتي ځواکونه په ټوله ډول تجهیز شي.
په افغانستان کې اوس شاوخوا ۱۳ زره او ۵۰۰ بهرني سرتېري پراته دي، چې ۸ زره او ۴۰۰ یې امریکایان دي.
