داعش وسله والو کسانو د عراق په موصل ښار کې د مسیحیانو پخوانی عبادت ځای ونړاوه.
د مسیحیانو دغه عبادت ځای (خانقا) ۱۴۰۰ کلونه لروغونی تاریخ درلود او دې ځای ته سنټ الیا، چې سیمه ییز نوم یې دیر المر الیا و، څو پېړۍ د مسیحي راهبانو عبادت ځای وو.
د اسوشېټېډ پریس خبري اژانس له خوا خپرو شويو انځورونو کې له ورایه ښکاري، چې دغه سیمه له خاورو سره خاورې شوې ده.
د راپورنو له مخې ښايي، چې د مسیحیانو دغه معبد داعش وسله والې ډلې د موصل ښار د نیولو په لومړیو وختونو کې ویجاړ کړی وي.
د پاول ثبیت په نوم یو مسیحي، چې د عراق ایربل ښار ته تبعید شوی دی؛ د مسیحیانو دغه معبد نړولو په اړه وایي، چې خپله ناراحتي په کلماتو کې بیانوی نه شي.
دی وايي، چې د مسیحیانو دغه ۱۴۰۰ کلن تاریخي عبادت ځای په وحشیانه ډول ویجاړ شوی دی.
د امریکا متحده ایالاتو د کلتور وزارت سلاکار سوزان بوټ کله، چې د دغه ودانۍ د ویجاړۍ انځورونه یې ولیدل په سترګو کې اوښکې راغلې.
ده وویل، کومه دېره چې داعش وسله والې ډلې ویجاړه کړې ده؛ د یو دین د جرړو لویه برخه یې له منځه وړې ده.
د سینټ الیا دغه مذهبي دېره د نړۍ ۱۰۰ مشهور مذهبي میراثونو په لیست کې شامله وه.
دغه دېره د شپږمې میلادي پېړۍ په وروستیو کې د قدیس مسیحي په ویاړ د سنټ اسیریان الیا په نوم جوړه شوې وه.
دغه لویه مذهبي سیمه د عراقي مسیحیانو او د خلیج په جګړه کې د امریکايي ځواکونو د هوساینې ځای و.
د مسیحیانو دغه مذهبي دېره په شاوخوا ۲۷ زره فوټ مربع ځمکه کې، چې د استوګنې ۲۶ اطاقونه لري جوړه شوې ده.
د عراق مسیحیان لومړنۍ ټولنې وې، چې مسیحیت ته یې مخه کړې وه، خو له کلونو راهیسې د مذهبي تبعیض په له امله د عراق مسیحیان له ۱،۳ میلیونو څخه ۳۰۰ زرو کسانوته را کم شوي دي.
