په افغانستان کې د ناټو د غوڅ ماموریت د ملاتړ لوی قوماندان جنرال جان نیکولسن یوې بهرنۍ رسنۍ سره په افغانستان کې د داعش د فعالیت په اړه اندېښنه ښکاره کړې ده.
نیکولسن زیاته کړې، چې د داعش ډله غواړي په افغانستان کې د خراسان په نوم خلافت جوړ کړي او د دې له پاره د نورو بهرنيو وسله والو په ګډون پاکستاني طالبانو هم ورسره لاس یو کړی دی.
د چارو ځېني څېړونکي هم تایيدوي، چې په نورو هېوادونو کې له ماتې وروسته داعش ډله په دې هڅه کې ده، چې څنګه په افغانستان کې د «خراسان» په نوم یو «خلافت» اعلان کړي.
دوی زیاتوي، چې دې ډلې د خپلو موخو ته د رسېدو له پاره په خپلو لیکو کې د پاکستاني طالبانو د جذب هڅې پیل کړې دي.
پاکستانی خبریال رحيم الله یوسفزي سلام وطندار سره په خبرو کې وویل، چې داعش ډلې لا وار له مخه په پاکستاني طالبانو کې د نفوذ کولو هڅې پیل کړې دي.
د یوسفزي په باور، داعش وسله واله ډله د «خراسان خلافت» اعلان له پاره ډېرې هلې ځلې کوي.
رحیم الله یوسفزی وايي، داعشي وسله وال د ځېنو بهرنيو استخباراتي کړيو په مرسته او د انسانتښتونې له لارې خپل مالي تمویل تر لاسه کوي.
خو په همدې حال کې د چارو کتونکی جاوید غفور بیا وایي، چې د داعش مفکوره د فغانانوپه منځ کې ځای نه لرې، خو د دوی تر شا ولاړې بهرنۍ کړۍ هڅه کوي، چې داعش په افغانستان کې پراخ نفوذي کړي.
په ورته وخت کې د چارو یو بل تحلیلګر محمد یونس فکور هم په دې باور دی، چې د پاکستاني استخباراتو په ګډون د سیمې د یو شمېر هېوادونو داسې هڅې روانې کړي، چې داعش په افغانستان کې د خراسان د خلافت د رامنځ ته کولو له پاره لارې چارې جوړې کړي.
دی د پاکستاني استخباراتو دې کار ته هم د یوې لوبې په سترګه ګوري، چې د یوې وسله والې ډلې له کمزوري کېدلو سره بله ډله راومنځته کړي.
خو د ملې دفاع وزارت مرستیال ویاند محمد رادمنش وایي، چې ملي اردو او ټول امنیتي ځواکونه دا ځواک لري، چې د هرې ترهګرې ډلې ناوړه پلانونه په افغانستان کې شنډ کړي.
دا څرګندونې په داسې حال کې کېږي، چې د ننګرهار ولایت له اچین نه وروسته په پچیراګام ولسوالۍ کې هم داعشيانو د ځایي اوسېدونکیو کورونه سوځولي او لسګونو کسانو ته یې مرګ ژوبله اړولې ده.
