ټاکل شوې ده د افغانستان فوټبال ملي لوبډله د ۲۰۱۸ کال فوټبال نړیوال جام او اسیایي جام سیالیو ته د لارموندنې په موخه د دويم (راتګ) پړاو لومړۍ، خو په ټولیزه توګه د روانو لوبو پنځمه لوبه وکړي.
د افغانستان فوټبال فدراسیون د یوې خبرپاڼې په خپرولو سره وایي، چې د افغانستان او سوریې فوټبال ملي لوبډلو ترمنځ لوبه به په سوریه کې د امنیتي ستونزو له کبله د عمان په کوربتوب وشي.
د ورکړل شوو معلوماتو له مخې، به د (راتګ) دغه پړاو لوبه به سبا د افغانستان پر وخت ماښام ۸ نیمې بجې پیل شي.
د افغانستان فوټبال فدراسیون وایي، چې د سبا شپې سیالۍ د عمان په پلازمېنه مسقط (سیب) فوټبال لوبغالي کې کېږي.
د دواړو لوبډلو ترمنځ د (تګ) پړاو لومړۍ لوبه څو میاشتې وړاندې په ایران کې وشوه، چې افغانستان په کې ۶ د صفر ګولونو پر وړاندې ماته خوړلې وه.
د فوټبال فدراسیون خبرپاڼه زیاتوي، چې افغان فوټبال ملي لوبډله په سنګاپور کې د ماتې له خوړولو وروسته عمان ته رسېدلې ده او د سبا ورځې سیالۍ له پاره یې ګټور تمرینات هم وکړل.
افغان فوټبال ملي لوبډله د روسیې په کوربتوب د ۲۰۱۸زېږديز کال د فوټبال نړیوال جام او ۲۰۱۹ کال اسیایي فوټبال جام سیالیو ته د لارموندنې په موخه په پنځم (ای) ګروپ کې شامله ده.
په روانو لوبو کې تر اوسه افغانستان د (تګ) پړاو ټولې څلور لوبې کړې دي، چې یواځې کمبودیا ته یې ماته ورکړې ده، خو له سوریې، جاپان او سنګاپور فوټبال ملي لوبډلو نه یې ماتې خوړلې دي.
د وروستۍ درجه بندۍ له مخې افغانستان په روان ټاکنیز پړاو سیالیو کې پر ۳ امتیازاتو سره د کمبودیا له لوبډلې وړاندې په څلورم مقام کې ځای لري.
د فوټبال نړیوالې شورا د معلوماتو له مخې، د افغانستان او سوریې فوټبال ملي لوبډلو ترمنځ د سبا ورځې (راتګ) پړاو لوبې له پاره د قرغزستان هېواد لوبڅاران ټاکل شوې دي.
افغانستان اوسمهال د فوټبال نړیوالې شورا په درجه بندۍ کې ۱۵۰م مقام، خو سوریه بیا په ۱۲۳م مقام کې ځای لري.
