بوگون «دوشنبه» توشدن سونگ، ساعت 1:30 اطرافیده، کابل شهری نینگ غرب تامانی دارالامان جاده‌سیده اداری اصلاحات و ملکی خذمت‌لر ایرکین کمیسیونی ایشلاوچی‌لری نینگ موتری پارتلش هجوم گه دوچ کیلدی.
ایچکی ایشلر وزیرلیگی سوزلاوچیسی نصرت رحیمی نینگ ایتیشیچه، اوشبو واقعه ایلگریدن موترده جایلشتیریلگن مقناطیسی ماین پارتله‌شی نتیجه‌سیده یوز بیرگن.
ساغلیق‌نی سقلش وزیرلیگی سوزلاوچیسی وحیدالله مایارنینگ ایتیشیچه، یوز بیرگن پارتلش‌ده اداری اصلاحات کمیسیونی نینگ 5 ایشلاوچیسی هلاک و باشقه 10 ته‌سی یره‌لنگن.
اوشبو واقعه مسؤولیتی‌نی حاضرگچه هیچ بیر گروه یا-ده کیشی بوینیگه آلمه‌گن.
شونینگدیک، اوتگن کون باشکینت ده تورت پارتلش یوز بیرگن ایدی، بو پارتلش‌لردن 3 ته‌سی کابل شهری نینگ بیشینچی حوزه‌سیگه تیگیشلی سیلو جاده‌سیده کیین مه کیین یوز بیردی و باشقه بیر پارتلش پل سوخته یقینیده سیلاولر ایرکین کمیسیونی‌نینگ موترینی هدف قرار بیردی.
اوشبو پارتلش‌لر مقناطیسی ماین‌لر آرقه‌لی یوز بیرگن و نتیجه‌ده 2 کیشی هلاک و باشقه 27 کیشی یره‌لنگن. اوشبو پارتلش‌لر مسؤولیتی‌نی داعش گروهی بوینیگه آلگن.
سونگی نیچه کونده پارتلش هجوملر شدتلنگن بیرچاغده، افغانستان بوییچه بیرلشگن ملت‌لر تشکیلاتی نینگ خاص نماینده‌سی تدامیچی یاماموتو، روزه هییت بیره‌می مناسبتی بیلن بیرگن قوتلاو پیامی‌ده اوروش تامانلریدن هییت کونلریده زوروانلیک‌لرگه نقطه قوییش‌لرینی سوره‌گن.
